Jennifer Lopez vendosi më në fund të martohet? Çfarë po kërkon të thotë me foton me fustan nusërie?

Jennifer Lopez shfaqet krejt papritur në story-n e Instagramit të një mikeshës së saj, e veshur me fustanin e nusërisë më romantik të Pranverës 2021, duke na bërë të dyshojmë. A ka mbërritur përfundimisht momenti për martesën (e shtyrë për shkak të pandemisë) me Alex Rodriguez?

Mos ndoshta JLo po na tregon provën zyrtare të veshjes së nusërisë për ditën e madhe?

Ëndrra e fansave prishet papritmas nga hashtagu #ShotgunWedding, i cili nuk është gjë tjetër veç filmi i ri i Jennifer Lopez.

Sipas thashethemeve të para, Shotgun Wedding është një komedi romantike, në të cilën martesa e trazuar e një çifti kthehet përmbys nga ardhja e disa kriminelëve. Në një përpjekje për të shpëtuar familjen e tyre, të dy do të rizbulojnë arsyet e dashurisë së tyre.

Jennifer Lopez padyshim që do të jetë protagoniste, ndërsa krahë saj, Josh Duhamel do të luajë rolin e burrit dhe bashkë-yllit.

Kështu që ky dhe kaq është misteri i veshjes së bardhë.

Dhe meqë ra fjala, në ç’pikë gjendet martesa e vërtetë e JLo? Këngëtarja ka bërë me dije se ajo dhe Rodriguez dëshironin të martoheshin në Itali në vitin 2020, pastaj ngjarja e shumëpritur u shty dy herë për shkak të pandemisë: “Ne kishim planifikuar atë që vërtet dëshironim. Nuk e di nëse do të jemi në gjendje për ta ribërë atë. E anuluam dhe nuk kemi folur që prej asaj kohe. Nuk ka asnjë nxitim. Ne duam ta bëjmë mirë, atëherë kur të mundemi. Duhet vetëm të presim dhe të shohim se ku shkon bota”.

Në shtëpinë time nuk ka komodina, por komoditet – Ingrid Gjoni, arreduesja që këndon me objektet

Ingrid Gjoni njihet si këngëtarja bukuroshe, e cila i përket një brezi që e njohin pa diskutim dhe e kanë ndjekur në të gjitha shndërrimet dhe eksperimentet bërë edhe lukut e jetës së saj, në këtë të fundit aq sa këngëtarja ka lejuar.

Ndoshta ndjekësit tanë e dinë se Ingridi ka mbaruar shkollën e Arteve dhe si gjithë studentët e kësaj dege, është e tërhequr prej së bukurës dhe ka kërkuar gjithmonë të eksperimentojë me të. Dhe ja ku erdhëm në pikën prej së cilës zë fill fakti që ne kemi bërë sot për ju një intervistë me Ingrid Gjonin, vajzën që pasioni i së bukurës e dërgon nëpër këndet e zbulimit të saj.

Kemi marrë vesh se i keni hyrë me pasion Interior Design-it. Nuk dua ta nis me pyetjen si ju lindi ky pasion, në mënyrë që të mos biem në grackën e intervistave të mëparshme. Do doja të dija:

1-Çfarë është për ju interior Design-i, çfarë përfaqëson për ju kjo degë e arkitekturës dhe artit njëkohësisht, me fjalë sa më të thjeshta e të ndiera?

Interior Design është një pasion, është një dhunti që të vjen nga brenda, varet se sa dashuri i jep edhe sa merr.

Sigurisht, ka lidhje me objektet dhe këto të fundit ndërtohen mbi shijen personale dhe mbi idenë që ti ke krijuar, që këtë dhomë apo këtë sallon do ta bësh në këtë formë.

Për shembull, për të shpjeguar se ç ‘është për mua ky art i ri, mjafton t’u them se mua po të më lesh gjithë ditën të merrem me një arredim shtëpie, unë rri gjithë ditën, dhe nuk e ndiej kohën që kalon, teksa punoj.

Unë nuk lodhem me këtë punë edhe sikur t’i përkushtohem gjatë gjithë ditës dhe nga këtu kuptoj brenda vetes se është një nga gjërat që më jep shumë pasion. Harroj çdo gjë, harroj kafenë, harroj të shkoj për të blerë veshje për veten, e kam kuptuar që jam shumë e përfshirë tek kjo gjë.

E kam nisur me gjërat e mia, që do të thotë me investimin tim të 20 viteve punë shumë të lodhshme si këngëtare. Ka qenë gjithashtu pasion që u kthye në profesion. Në fakt, investimet e mia kanë qenë shumë të kufizuara, sepse unë kam dashur të jem me këmbë në tokë dhe jam munduar të investoj në një fushë që i shkon karakterit tim dhe jam përkushtuar te shtëpitë. E fillova me arredimin e shtëpisë sime, por jo se nuk kam qenë gjithmonë e pranishme me këshilla dhe ide për njerëzit e afërt, për shoqërinë. Madje, dje, shumë mikesha më kanë thënë se kishin 10 vite që më kishin thënë të merresha me këtë punë. Por duke qenë se unë jam një njeri me këmbë në tokë, më është dashur të piqem njëherë, si nga ana material, ashtu edhe nga ana profesionale, në mënyrë që të bindesha se doja ta bëja këtë gjë.

2. Kur prekni me mendje, pra skematikisht, orenditë që përbëjnë arredimin, çfarë ndieni, si e kuptoni që ato janë të duhurat?

Mua më ndodh që nga një objekt të ndërtoj idenë për arredimin e dhomës, edhe pse mund të mos e kem fare të qartë dhomën dhe pozicionin e saj. Zakonisht më frymëzojnë objektet që shoh. Për shembull, tek arredimi i dytë që kam bërë, e kam marrë spunton nga një abazhur. Që do të thotë, ai abazhur ngeli shumë thellë në zemrën time dhe, nisur nga ai, fillova të ëndërroj si do të mund të ishte ngjyra që do të përmbante dhe si do të ndërtoja arredimin.

Një tjetër objekt që më ka frymëzuar ka qenë dera, që nuk është një derë normale, sepse mua nuk më pëlqejnë gjërat normale, as gjërat e ekzagjeruara, më pëlqejnë gjërat e veçanta të cilat i bëjnë njerëzit kuriozë.

 Këto objekte mund të jenë rëndom gjithandej, por jo çdo sy mund t’i shohë dhe të guxojë t’i përdorë. Mbi këto dy elementë unë rrezikova, duke qenë se aty kishte edhe arkitektë, të cilët në vendin tonë shpesh marrin përsipër edhe arredimin, gjë që për mua nuk është korrekte, pasi arkitekti nuk i njeh shijet e arredimit. Besoj gjërat janë të ndara, ashtu si në muzikë.

E frymëzuar nga këto dy objekte unë krijova idenë e një ambienti në ngjyrë të zezë. Kjo ishte shumë e guximshme dhe të gjithë njerëzit më thanë të mos e bëj të zezë, pasi po rrezikoja shumë. Unë u thashë se e doja të zezë, pasi gjithë koncepti im ishte projektuar mbi të zezën. I vetmi element që do të thyente të zezën, ishte parketi në ngjyrë bezhë, ndërsa dollapi do të ishte i zi me ndriçim.

 Një element tjetër që më inspiron, është mermeri. Mbi mermerin që shoh, filloj të fantazoj arredimin e kuzhinës duke menduar edhe për objektet e tjera.

3. Ka një grup mendimi që thotë se vetëm personi i cili do të banojë shtëpinë, di ta bëjë të ngrohtë atë. Ju tremb ky fakt, apo nuk e konsideroni si të vërtetë?

Mua nuk më tremb, pasi njoh veten dhe besoj tek aftësitë e mia, besoj edhe te shija e miqve të mi, të cilët surprizohen, pavarësisht se kanë parë arredime në mbarë botën. Mua ky fakt më lumturon, sepse kushdo që ka ardhur, mbase dhe persona të cilët janë marrë prej vitesh me arredim, gjithmonë më kanë pyetur mbi personin që më ka arreduar shtëpinë.

4. Ju e perceptoni ngrohtësinë që jep arredimi i shtëpisë, ndërsa këtë po e ndërtoni për dikë tjetër, i cili mund të jetë klienti juaj?

 Nëse do të bëhet fjalë për një klient, gjë që e kam praktikuar më herët përmes këshillave për miqtë e mi, besoj se do të kisha bërë punë më të mirë. Sigurisht që klienti fillimisht duhet të caktojë disa kritere, sepse ka njerëz që janë tek e bardha dhe e zeza, ka të tjerë që qëndrojnë tek e kuqja, ka shumë tipologji njerëzish. Do të duhet të diskutosh me njeriun që të beson shtëpinë. Nuk mund të jetë krejtësisht personale. Në Shqipëri ndodh rëndom të bëhet krejtësisht personale. Ti has në ndonjë ambient dhe pyet mbi arredimin, të përgjigjen duke thënë se arredimin e ka bërë arkitekti. Kjo gjë mua nuk më pëlqen, pasi arkitekti ka shije të tjera nga ato të interior designerit. Por sidoqoftë, klienti duhet pyetur dhe duhet të dimë se ku qëndron shija e tij, si dhe çfarë ngjyrash preferon në shtëpi. Gjithashtu i rëndësishëm është edhe buxheti që ka menduar klienti.

5. Mund të ndani me lexuesit tanë kureshtarë, elemente dhe kuriozitete nga arredimi i vilës suaj?

Kam hasur vështirësi me personat që merren me punët brenda shtëpisë, si: bojaxhinjtë, elektricistët, personat që shtrojnë parketin etj. Këtë punë duhet ta bësh me shumë pasion, që të mos jesh ajo gruaja e cila mbas tre javëve shkon dhe sheh se punimet janë ende te parketi. Unë jam një njeri i guximshëm dhe i qëndroj punës në kokë gjithë kohës. Shoh shumë vështirësi që janë të zanateve të tyre, jo të profesionit tim, por gjithsesi, përpiqem t’i ndihmoj.

Unë e kam ndërtuar idenë e arredimit pak nga pak. I kam mbledhur elementet një nga një. Nuk shkova të porosis një dhomë gjumi me komodina tradicionale; në shtëpinë time nuk ekzistojnë komodinat. Ekzistojnë dollapët ku nuk duket asgjë, që janë të krijuar me një material nga fillimi deri në fund. Në shtëpinë time nuk ka komodina, por komoditet. Elementët e tjerë i kam ndërtuar mbasi kam bërë dollapin si kryesor dhe krevatin. Të tjerat i krijova duke parë në dyqane të tjera, që të mos ndërtohet ambienti mbi të njëjtët elementë. Ndaj edhe doli diçka e bukur e me shije.

Nuk është aq e thjeshtë, është pasion, por s’kam ndjekur rrugën e lehtë. Ndaj e kuptoj se këtë gjë nuk mund ta bëjë çdokush. Unë nuk shkoj në një mobilieri për t’i thënë më sugjero ti, unë shkoj me ide të qarta dhe dua t’i rri në kokë çdokujt, pasi dua të dalë ajo që kam menduar unë.

 Më ka ndodhur në një rast, kur kam dashur t’i vendos drita led krevatit dhe nuk kanë ditur ta bënin, pasi nuk e kishin projektuar më parë. Kam vrarë mendjen shumë për të arritur të bukurën dhe kam arritur ta gjej zgjidhjen. Them se truri duhet futur më shumë në punë.

6. A bashkëpunoni me klientët tuaj duke marrë parasysh edhe dëshirat e tyre, apo ju intereson më shumë “carta bianca”, pra liria në punën tuaj kreative?

Sigurisht që më intereson. Por interior design është përgjegjësi dhe unë jam njeri shumë i përgjegjshëm, jo vetëm në këtë aspekt, por edhe në përgjithësi. Po ta fillojmë nga muzika, jam nga ato këngëtare që qëndrojnë deri në fund e nuk lëviz pa u mbyllur lokali kur kam qenë e ftuar aty, kam përgjegjësi dhe e çoj punë deri në fund. Këtë e dinë të gjithë ata që më njohin dhe kanë punuar 17 vite me mua.

 Edhe arredimi është një përgjegjësi shumë e madhe. Me ata njerëz që mund të pëlqejnë shijen time, bazuar në ato fakte që unë kam publikuar, mund të ulemi të diskutojmë. Jam shumë e gatshme të ulem dhe të diskutoj për të kuptuar këndvështrimin e klientit, psikologjinë e tij dhe buxhetin. Nga ana tjetër, është e rëndësishme të kuptosh edhe prioritetet e tyre, në duan një shtëpi komode, apo diçka tjetër.

7. Ka të bëjë frymëzimi në arredim, duke pasur parasysh se është një formë arti?

Siç e thashë edhe më sipër, unë frymëzohem nga objektet, diçka e vogël më jep shtysë për të ndërtuar diçka shumë të madhe. Madje më ka ndodhur shumë herë me njerëzit me të cilët shoqërohem, janë nxituar të më japin mendime dhe u kam thënë të presin, sepse nuk e kanë parë rezultatin final.

Unë marr shkas nga diçka dhe i kam idetë shumë të qarta. Për shembull, bëj kondicionerin në ato përmasa që më japin. Arkitekti mund të thotë: shiko se do të bjeri tavani shumë poshtë dhe ti nuk do ta bësh dot kondicionerin, ashtu si dëshiron. Dhe unë vras mendjen për të gjetur zgjidhje. Pastaj prezantohet një problem i ri, ngjyra e kondicionerit është e bardhë, ndërkohë që mua më duhet e zezë. Kjo më prish gjithë dhomën. Pastaj filloj të mendoj se kush mund të jetë njeriu që do të marrë përsipër ta lyejë me ngjyrë të zezë. Një detaj tjetër në Lalz. Çdo gjë ishte e zezë, ndërsa bolieri ishte i bardhë. E çmontuam dhe e çuam në një vend ku lyheshin makinat. Kështu që erdhi i zi. Te shtëpia ku çdo gjë është e zezë, vetrata ka dalë e bardhë nga brenda. Në fund, mjaftoi të vendosje adeziv dhe ambienti dukej super luksoz. Por më është dashur të pyes shumë persona, për të arritur tek ideja e adezivit.

8. A ju ka bërë kjo punë e re të mendoni ndonjëherë: “si nuk ndoqa edhe studimet e larta në arkitekturë”?

Arkitektura është aty, janë përmasa fikse; unë nuk kuptoj shumë nga përmasat e sakta, por di të them se përballë personave që janë profesionistë në këtë fushë, në shumë raste, me sy të lirë dhe me shijen e idenë që kam pasur në mendje, më ka ndodhur të kem hedhur poshtë përmasat e arkitektëve.

 Sigurisht nuk jam e aftë për të bërë matje, por kur shkoj te frigoriferi, te pianura, te furra, që në momentin e parë, unë e kam parë faqen e murit dhe e di se sa objekte mund të më duhen për të ndërtuar kuzhinën. Vërtet mund të mos i di përmasat, por shoh orenditë dhe e kuptoj çfarë duhet të bëj. Gjithsesi, arkitektura është tjetër gjë, kurse unë dua disenjimin, që ka të bëjë me shijen.

9. Ka ndonjë material që mban peng idetë tuaja në arredim?

Më pëlqen druri, por në stilin modern. Nuk e shoh shumë veten te klasikja, qëndroj te modernia, deri te neo-klasikja. Materiali që më pëlqen shumë të përdor në dhomat e gjumit është letra murale, pasi jep shumë ngrohtësi, nëse di ta shohësh dhe zgjedhësh mire atë. Për shembull, dhoma e gjumit që u arredua në ngjyrë të zezë, ka një letër murale të gjelbër dhe atë e kam kombinuar edhe me një abazhur të vjetër të cilin e kam përshtatur për këtë rast.

10.Tani që po i vjen fundi intervistës sonë, do të doja të dija, cila është ëndrra juaj më e madhe që mbetet për t’u realizuar sa i përket interior design-it?

Kam ecur me hapa të vegjël dhe çdo gjë është ndërtuar në shumë vite, me shpresën se mund të zgjerohem në një të ardhme. Mbase kjo mund të dojë dhe kohë, mund të mbetet edhe thjesht dëshirë, por pse jo të ketë një vila 2, vila 3, vila 4, pa u bërë shumë lakmitare. Dëshira ime është që ta zhvilloj këtë projekt me vila plazhi, të arreduara nga unë. Nuk e kam filluar këtë rrugë për të fituar, pasi për mua është më shumë çështje pasioni dhe dëshire. Është arti im që dëshiroj ta ndaj me njerëzit. Ky pasion për arredimin më ka bërë të shkoj drejt këtyre objekteve. Nëse para 15 viteve mendoja për të blerë veshje, ose çanta për vete, sot nuk më shkon dora tek ato. Përveçse t’i blej Paridit (djalit), më shkon dora te filxhanët, te kornizat… ndoshta mund të jetë dhe tregues i moshës, por gjithsesi qëndrojmë brenda së bukurës.

Jo instrumente, por partnerë në sukses – Estela Ujka flet për nismën më të re të influencuesve në ndihmë të biznesit të vogël

Së fundmi, blogerja dhe influencuesja e njohur Estela Ujka ,nisur nga situata e pafavorshme, që po kalon biznesi i vogël vendas pas izolimit, ka marrë një nismë, e cila synon të ndihmojë këtë të fundit me anë të marketingut në rrjetet sociale. Në një intervistë ekskluzive për revistën VIP, Ujka ka shpjeguar nismën në fjalë, si dhe ka orientuar bizneset e vogla, të cilat mund të jenë të interesuar për t’u bërë pjesë e saj.

Përshëndetje, Estela! Së fundmi ju keni marrë një nismë që synon mbështetjen dhe promovimin e biznesit të vogël vendas. Si ju lindi ideja? A erdhi kjo si pasojë e periudhës së izolimit që përjetuam të gjithë?

-Ideja më lindi pasi unë jam gjithë kohën në kontakt me bizneset, të cilat promovoj në platformat e mia sociale, dhe sigurisht që pandemia ndikoi ndjeshëm në ekonominë e tyre. Bizneset me të cilat ne bashkëpunojmë më shumë  janë dhe ato që u prekën direkt nga pandemia, Fashion, Beauty, Events, Restorantet dhe Turizmi.

Shumica e bizneseve që unë punoj kanë paguar qiratë, punonjësit, detyrimet në shtet dhe gjatë  2 muajve që ishin të karantinuar, ndaj duke qenë në kontakt me ta ndienim përgjegjësinë t’i ndihmonim duke i reklamuar bizneset e tyre pa pagesë dhe duke rritur vëmendjen e publikut, sidomos në mbështetje të bizneseve të vogla vendase!

Duke i pasur në krah në rritjen tone si influencers ishte më e pakta që mund të bënim në këmbim. Ne jemi zotuar t’i suportojmë me postime në 2 javët në vazhdim, që më besoni është një sfidë e vërtetë edhe për ne pasi të gjithë bizneset kanë nevojë  për marketing online.

– Supozojmë se një biznes i vogël sheh këtë ndërmarrje tuajën dhe dëshiron të bëhet pjesë. Si duhet të veprojë?

-Bizneset mjafton të shprehin interesin për të qenë  pjesë e fushatës, por sigurisht duke pasur kërkesa të panumërta ,ata duhet të japin një arsye, apo veçanti pse duhet t’i ndjekin, apo mbështetin njerëzit në  sipërmarrjet e tyre të vogla. Unë personalisht më pas mundohem të bëj një selektim, cilat nga këto biznese vërtet mund t’i ndihmoj, t’i jap një shtysë dhe cilat jo, siç e kam shprehur dhe në storiet e postuara jam munduar të  skartoj faqe me përmbajtje që nuk e kanë  krijuar vetë ata, faqe që shesin produkte të falsifikuara, faqe që kanë shumë pak postime ,(më pak se 20), faqe që reklamojnë produktet në tokë, apo të reklamuara shumë keq, faqe që kërkesa e tyre nuk është artikuluar qartë  dhe më  besoni ka shumë, sikurse nuk janë pjesë e këtij promocioni personal blogs. Duke qene se kërkesat janë realisht të  shumta uroj dhe shpresoj që të paktën të  gjithë të  kenë një përgjigje nga unë.

– Instagrami juaj këto ditë është mbushur me story, ku promovohen bizneset e vogla, të cilat nuk kanë shumë mundësi reklamimi. A i janë bashkuar nismës suaj edhe personazhe Vip?

-Patjetër që dhe personazhe të  tjerë i janë bashkuar nismës, kryesisht blogere Odetchie, Eraldo Rexho ,Niko Komani pasi mendoj se është momenti i duhur që të  përdorim influencën që  kemi për një kauzë të  mirë dhe sigurisht, pse jo të shprehim mirënjohjen e mbështetjen tone për bizneset që na kanë  suportuar  e sponsorizuar projektet tona. Unë jam me parimin që të marrësh duhet dhe të  japësh, njerëzit që na ndjekin nuk inspirohen për fee-t e lakmueshme që ne paguhemi për një postim, por na ndjekin për atë që përfaqësojmë, njerëz që  pasionin e tyre e kanë  kthyer në  profesion, që  influencën e kane ndërtuar me punë dhe që në  fund të  ditës  ndajnë të  njëjtat vlera me ne. Ne nuk jemi të diktuar nga vlerat monetare, por duam të jemi diçka më  shumë, duam që të jemi model i mirë dhe inspirues për të  gjithë që na ndjekin.

Pse është e rëndësishme kjo nismë për ju dhe nëse keni një mesazh për ta ndarë edhe me ndjekësit tanë, të revistës Vip?

-Për ne është e rëndësishme që  këtë  krizë  financiare ta kalojmë të   gjithë, dhe nëse jemi ne një shtysë  që  ta kalojnë më lehte do të  ishim vërtet të  lumtur. Unë personalisht pata mundësi të  njoh biznese që nuk i njihja më parë, pata mundësi të njoh vajza e gra që me kreativitetin, apo dy-punësimet e tyre ndihmojnë ekonominë e familjes, apo studimet dhe me thëne të drejtën në  fund të  ditës mbushesh me pak shpresë  dhe energji të  mirë , që jo të gjitha vlerat kanë humbur në  këtë vend.

Mesazhi qe kam për ndjekësit e revistës VIP është të  besojnë tek e mira dhe vlerat, dhe të jenë  gjithmonë pozitivë, dhe sigurisht të na ndjekin ne 😀

Mareni për te Për’Puthen i bie nga Kina

Intervistë ekskluzive me Maren Hoxhën

Ai do të mbahet mend për hyrjen në studio me sheqer dhe piper në duar: piperin për Antonetën dhe sheqerin për Inën. Ka deklaruar se ka shkuar te emisioni Për’Puthen për Antonetën, ndërkohë, ajo që s’është thënë për të, është se ai mbërrin në emisionin e ndjekur masivisht, pas pjesëmarrjes në disa filma si aktor. Revista Vip realizoi me të një intervistë.

Kush është Mareni i para “Për’puthen”?

Unë jam një djalë 25-vjeçar. Kam mbaruar shkollën për IT në Durrës. Mbas një vit qëndrimi në Amerikë, u ktheva për të kryer studimet e larta në vendin tim. E ndërkohë që vazhdoja studimet, dëgjova për një audicion që bëhej nga regjisori Fatmir Koçi dhe thashë: pse jo? Shkova dhe fitova. Më dhanë rolin e një kapo-bande, rol i rëndësishëm për një 19-vjeçar. Duke qenë se bashkëpunimi i parë shkoi mirë, regjisori më kërkoi edhe për një të dytë, “Elvis walks home”, rolin e një ushtari serb.

Ndërkohë, rrahjet e zemrës gjatë kësaj periudhe?

 A, ju doni të dini për dashurinë e parë?! Sigurisht. Kam qenë 18 vjeç kur u dashurova për herë të parë, por nuk zgjati shumë sepse ajo u transferua jashtë vendit. I mbajtëm kontaktet edhe për pak kohë, por nuk po funksiononte më. Largësia bëri të vetën.

Kur erdhi filmi tjetër “Balkan Blood”?

Edhe këtë herë me audiencë të hapur. Regjisori Shu Hau ishte në kërkim të plotësimit të kastit me aktorë shqiptarë. Duke qenë se aktorit kryesor kinez i duhej një krahë i djathtë, atëherë më zgjodhën mua.

Ku u bënë xhirimet?

Në Petrelë, te Vila e Zogut në Durrës dhe në portin e Vlorës.

Të gjitha rolet me personazhe negative. Çfarë kanë parë regjisorët te ty?

Regjisorët kanë intuitën e zbulimit të karakterit të personazhit që duan, në fytyrën e aktorit. Ndoshta të dy regjisorët panë këtë tek unë. Nuk është e thjeshtë të luash personazhet negative.

Si ishte të punoje me regjisorin kinez?

Ishte një eksperiencë e jashtëzakonshme. Regjisori ishte tepër komod, edhe pse unë ndihesha shumë i frikësuar. Roli ishte me përgjegjësi dhe ia dola.

Nga filmi kinez drejt e te “Për’puthen”, pse kjo zgjedhje?

Doja të provoja edhe një eksperiencë të gjallë televizive. Ku i dihet, ndoshta deri në fund përputhem me Antonetën. (qesh)

Si është kjo eksperiencë e re?

 Krejt ndryshe nga filmi. Po vë re se njerëzit më njohin më shumë si Mareni i Për’puthen se djali i filmave.

 Përse i dhurove Inës sheqer dhe Antonetës piper?

Doja ta bëja hyrjen time më komike, por me sa u pa, u keqkuptua nga të dyja vajzat.

Është e vërtetë se ke shkuar në emision vetëm për Antonetën? Nuk do të dalësh asnjëherë me Inën dhe Edonën?

Më pëlqen të fokusohem e të bëj për vete vetëm një vajzë, dhe ky është mesazhi që dua të jap edhe për djemtë e tjerë të moshës sime.

Çfarë do të ndodhë me të ardhmen tënde, duke qenë se të dy djemtë e familjes (edhe vëllai yt) aspirojnë filmin?

Unë së shpejti do t’i bashkohem familjes sime në Amerikë. Synimi im është Hollivudi. Duket si ëndërr e madhe, por pse jo? Sot mund të arrihet gjithçka; punë, pasion, pak fat dhe besoj se mund të realizohet.

Kujt i je mirënjohës për çfarë ke bërë deri tani dhe djalin që je?

Dua të falenderoj tim atë që më ka mbështetur në çdo hap timin! Ka fare pak kohë që e humba babin, por do të punoj fort për ta bërë krenar për mua.

Dua t’ju falenderoj edhe ju të revistës Vip, për intervistën.

Skandali i ‘Për’Puthen’, Albani: “Nuk kam thyer ndonjë rregull”

Ditën e diel, në Për’Puthen tek e Diell në Top Channel plasi debati  mes Albanit dhe gjithë të tjerëve. Shkaku ishin mesazhet që kishte shkëmbyer Albani me një vajzë, e cila ishte e gatshme të paguante, për të pasur një dhurues të materialit gjenetik për një fëmijë të dëshiruar.

Të gjithë protagonistët e emisionit filluan të diskutojnë rreth ngjarjes dhe të japin opinionet e tyre. Duket sikur edhe produksioni ka ndërmend ta penalizojë Albanin, por nuk dihet ende se çfarë vendimi do të marrin.

Ne e intervistuam Albanin, për të kuptuar më mirë se si janë zhvilluar ngjarjet.

Ti njihesh tashmë si Albani i Për’puthjes, po kush je ti në të vërtetë?

-Edhe pse njerëzit më etiketojnë si Albani i Për’puthen, unë vazhdoj të jem ai që kam qenë, një i ri i zakonshëm, me ca ambicie për të shkuar përpara. Për mua asgjë s’ka ndryshuar.

Po bëhet zhurmë e madhe pas ngjarjes së fundit, të së dielës kur u diskutuan mesazhet e tua me një vajzë që ishte e gatshme të paguante për një fëmijë, duket se opinionet  janë ndarë më dysh. Po ti si ndihesh?

– I cenuar privatisht . Megjithatë, nga natyra jam tip kurioz  dhe vëzhgues, dhe të them të drejtën më intrigoi fakti se deri ku do të shkonte kjo histori. Pse një vajzë e re nuk po i drejtohej bankës së spermës, për sa kohë ishte e gatshme të paguante dhe kërkonte ta blinte atë privatisht. E dyta, si ka mundësi që nuk kishte asnjë djalë rreth vetes, për t’ia arritur qëllimit të saj, qoftë edhe pa pagesë. Gjithsesi, cenimi i privatësisë më ka lënë shije aq të hidhur, sa vështirë ta harroj lehtë.

U diskutua në studio për një masë që do të marrë produksioni. Ti je i gatshëm për çfarëdolloj mase të jetë ajo?

– Unë e pranova në studio. Në këtë moment jam i gatshëm për gjithçka, sepse nuk mendoj se kam thyer ndonjë rregull sa i përket  produksionit. Mund të kem thyer ndonjë rregull moral, por me mbështetjen e njerëzve në rrjetet sociale, më rezulton se as këtë nuk e paskam thyer. Edhe pse, dua të theksoj se kjo është një çështje shumë delikate.

Ina u shpreh se ndihej shumë e zhgënjyer nga ty. Si ndihesh në lidhje me këtë? Çfarë ke ndërmend të bësh për ta rifituar besimin e saj?

– Në fakt java ka qenë shumë e nxehtë dhe nuk kam arritur dot të komunikoj me Inën, përveçse në studio. E kuptoj zhgënjimin e saj, jam duke menduar. Ende nuk e kam një ide, por do të luftoj për ta rifituar në një formë besimin e saj.

Ti u shprehe se kishe nevojë për para. A nuk iu paguan mjaftueshëm Top Channel?

Ne nuk paguhemi fare, por kjo nuk ka të bëjë me faktin që unë kërkova lekë aty.

Po planet e tua për të ardhmen?

– Deri tani kam qenë i bllokuar me emisionin, por sikurse duhet menduar seriozisht e ardhmja, vendosa së fundmi të investohem në një biznes timin, një qendër masazhesh. Shohim si do të shkojë!

Një mesazh, apo diçka që të ka ngelur pa thënë  dhe që dëshiron ta thuash patjetër? 

Falënderoj  gjithë ndjekësit e mi që më kanë suportuar me komente pozitive. Unë jam njeri i ndjeshëm, mbase nuk e kam përcjellë dot këtë te njerëzit, por në përgjithësi kam ndjekur komentet që më bëhen. Diku kam reflektuar, diku jam nervozuar, por në fund të fundit kam vendosur të ndjek rrugën time.

Ju falënderoj për intervistën, duke qenë se është e para për mua!

Ekskluzive, Nevina Shtylla mes televizionit dhe kinemasë

Nevina Shtylla, është një nga prezantueset më të dashura për publikun. Kjo falë ëmbëlsisë dhe qetësisë që tregon kur flet. E kurorëzuar Miss Shqipëria në vitin 2010, Nevina ka ditur si t’i ngjisë shkallët e karrierës pa bërë shumë zhurmë duke u ngjitur gjithnjë e më lart. Sot e shohim çdo javë në krah të Edi Manushit, tek PËR’PUTHEN. Mirëpo, projektet për prezantuesen nuk mbarojnë aty. Sivjet Top Channel, i besoi maratonën e çmimeve Oscar, një përgjegjësi shumë e madhe për çdo njeri të ekranit. Ndër të tjera Nevina është e angazhuar edhe në një projekt tjetër të cilin na e ka rrëfyer pak më poshtë në një intervistë ekskluzive për Revistën VIP

Top Channel të zgjodhi ty për të ndjekur në transmetim të drejtpërdrejtë ndarjen e Oscar-ve, ishte më shumë kënaqësi apo përgjegjësi?

Mund të them se ishte një ndërthurje e te dyjave por ne ketë rast, përgjegjësia e madhe e shtonte edhe me tepër kënaqësinë. Ne një transmetim live dhe maratone është gjithnjë i vështire sikur dhe thjeshte për te ruajtur te njëjtin ritëm ore pas ore. Ndihem e privilegjuar qe drejtuesit e Top Channel ma besuan ketë projekt prestigjioz.

Si ishte si eksperiencë?

Emocionuese! Kishte kaluar pak kohe që kur kisha  ndierë  për here te fundit entuziazmin e një transmetimi live dhe me kishte marre malli.

E nisim me tapetin e kuq. Revista të ndryshme botërore ishin me sy e veshë mbi yjet që parakalonin aty dhe nisën të bënin listimin e personazheve të veshur më mirë dhe atyre më keq; e ke ti një listë tënden për të dy rastet?

Unë nuk mund ta klasifikoj veten si shumë  të dhënë  pas fashion, e aq me pak te jem kritike, por duke u bazuar në  shijet e mija personale, një nga look-et më të preferuara ishte ai i Scarlett Johansson. Mu duk një stil të cilin do ta kisha zgjedhur dhe vetë me shumë  kënaqësi. Nga ana tjetër, veshja që ndoshta mu duk me pak e përshtatshme  ishte ajo e Billie Eilish. Edhe perse me Chanel dhe e klasifikuar si ndër me të bukurat ose qe i përshtatej tipit te këngëtares, mendoj se nuk ishte e duhura për eventin.

Çfarë të emocionoi më shumë gjatë transmetimit?

Çdo here qe fitues shpallej një nga filmat e preferuar ndjeja një gëzim te madh. Momenti i “In Memorial” ishte pa diskutim shume emocionues për te gjithë shikuesit. Ndoshta mund te përfshi ne këtë përgjigje edhe perfomancën e Eminem. Është një artist qe e vlerësoj dhe dukshëm nuk jam e vetmja.

A ishte filmi fitues i njëjtë me atë që ishte favoriti yt?

Ne këtë edicion beja tifozllëk te madh për dy filma. Për JoJo Rabit, sepse jo e gjithë audienca kishte arritur te vlerësonte fabulën, stilin dhe komedinë e filmit dhe i trembesha një gjykimi jo shume objektiv, por për fat kjo nuk ndodhi. Arriti te merrte çmimet e merituara për aq sa ofronte e përfaqësonte.

I dyti dhe me i pëlqyeri nga unë ishte pa diskutim Parasite, fituesi i madh dhe mese i merituar. Një moment qe është shënuar ne histori tashme dhe qe fal shume shprese për kinematografinë përtej USA.

Po për aktorin dhe aktoren më të mirë ç’mund të na thuash?

Nga dy te përzgjedhurit, jam plotësisht dakord me Joaquin Phoenix si fitues. Nuk kishte asnjë dyshim për këtë. Nga ana tjetër rikthimi i suksesshëm i Renee Zellweger u vlerësua nga akademia. Ne opinionin tim, do te kisha preferuar Saoirse Ronan.

Çfarë mendimi ke për fustanin e Natalie Portman?

Zgjedhje e duhur dhe i shkonte shume fizionomisë  se saj.

Sa filma ke parë ti nga të nominuarit?

Kam ndjekur pjesën me te madhe te tyre ende pa mu besuar ky projekt. Ne javët e përgatitjes plotësova listën e nominimeve ne kategoritë kryesore dhe atyre me te favorizuarve ne kategoritë e tjera.

Ç’mendim ke për Oscarin e këtij viti, a ishte ai në vazhdën e viteve të tjera?

Duke u ndaluar tek fituesi i madh i mbrëmjes nuk me mbetet asnjë kritikë. Të gjithë skeptikeve iu vërtetua e kundërta dhe ndoshta ky ishte një nga ato vite ku do ketë me pak kontestime ndaj fitueseve te çdo kategorie. Nuk mund te them ne 100% por ne mënyre dominuese këtë here opinioni i masës është se statujat shkuan tek fituesi i merituar.

A ndihesh komode në drejtimin e Për’Puthen, në krahë të eksperiencës së Edi Manushit?

Edi pa diskutim është një figure e konsoliduar, karizmatik dhe shume e dashur për publikun. Tashmë mund ta quaj dhe një mik shume të mirë timin, me të cilin është gjithnjë kënaqësi  të punosh. Ndonëse për mua tashme janë bërë 10 vite pjese e televizionit dhe 5 vite ne mediet më të fuqishme e më në  zë  të vendit, ka gjithnjë për të mësuar e për të përmirësuar.

Një projekt të bazuar tek dashuria e kemi diskutuar gjatë me Edin që në sezonin e shkuar. Për fat PerPuthen erdhi ne kohën e duhur e me një format që mori menjëherë vëmendjen e audiencës. Ndihem mire që mu besua mua drejtimi i këtij reality krah Edit qe çdo gjë e bën edhe më komode.

Ti po angazhohesh së fundmi edhe në kinematografi, cilat planet e tua për të ardhmen? A janë ambicioze ato? Ku do ta shohim Nevinën pas Pwr’puthen?

Per’Puthen do të vijoje deri ne fund të sezonit dhe do te rikthehet edhe sezonin e ardhshëm televiziv. Angazhimi ne Tv është full time ndaj me duhet ta menaxhoj kohen edhe mes projekteve te tjera. Aktualisht kemi nisur punën për realizimit e filmit te ri. Do te jete një rikthim i imi ne aktrim ne rol kryesor dhe njëkohësisht do te mbaj edhe pozicionin e producentes. Këtë here behet fjale për një karakter tërësisht ndryshe, ne një zhanër te pa prekur me pare nga unë ndaj jam shume e entuziazmuar. E quaj si një sfide me veten këtë realizim. Detajet do t’ia le një momenti tjetër por shume te afërt.