Protestë e vajzave dhe grave në Rrëshen, pas përdhunimit të vajzës 15-vjeçare

proteste e grave ne rreshen

Ditën e sotme, vajza dhe gra aktiviste të të Drejtave të Grave kanë protestuar në qytetin e Rrëshenit. E gjitha kjo në mbështetje të skandalit të disa ditëve më parë, kur një 15-vjeçare dhe familja e saj kanë denoncuar një grup prej 5 personash, për përdhunimin në grup.

Protesta kundër përdhunimit

Vajzat dhe gratë mbanin në duar pankarta dhe kanë marrshuar në qytet me thirrjet: “Ti nuk je vetëm” apo “Përdhunimi është krim”.

Protestueset kërkojnë ndërhyrjen e institucioneve shtetërore kundër përdhunimeve të grave e vajzave, si dhe marrje masash të ashpra lidhur me këtë.

Në protestë u panë edhe nëna, të cilat të pasigurta për vajzat e tyre të reja, me lot në sy shprehen se faji nuk është i vajzave, por i atyre që përdhunojnë.

Gjithashtu, në radhët e protestuesve ka qenë edhe Ipeshkvi i Rrëshenit, Dom Gjergj Meta, në mbështetje të grave dhe vajzave dhe “në respekt për tjetrin, për trupin e tjetrin, për gratë fëmijët, adoleshentët. Respekti është në bazën e gjithckaje”, siç shprehet ai.

Nga ana tjetër, edhe Delegacioni i BE-së në Shqipëri është shprehur sot në mbështetje të grave dhe vajzave, duke u shprehur se “indiferenca vret”.

Ngjarja e përdhunimit

Vajza 15-vjeçare nga Mirëdita u përdhunua për një muaj nga një grup prej 5 personash. Personat, të gjithë në moshë madhore, madje edhe familjarë shumica e tyre, veç një 17-vjeçari, kanë marrë masën e sigurisë “arrest me burg”. Ngjarja e ka zanafillën në datën 8 mars dhe vajza kërcënohej me foto e video për të heshtur.

Të gjithë personat ishin të njohur të familjes, duke qenë banues të një vendi të vogël. Ndërkohë familjarët e vajzës kërkojnë largimin e tyre nga vendi i banimit, pasi prania e tyre thellon problemet psikologjike të së resë.  

Pritet që protestat e aktivisteve të të Drejtave të Grave të vazhdojnë edhe në qytete të tjera, ndërsa ditën e dielë, një protestë e madhe po organizohet në kryeqytet.

Djali i Guljem Radosë, dedikim të atit: “Do ndrijnë akoma sytë e tu…”

Djali i Guljem Radosë, aktori Redi Radoja i ka dedikuar të atit një status prekës në rrjetin social, Facebook.

“Pushofsh në paqe bab! Do ndrijnë akoma sytë e tu mbi ballin e vajzës, djalit, mbesave dhe nipit të vogël …”, shkruan Redi Radoja në statusin e vet në Facebook.

Aktori Guljem Radoja u nda nga jeta sot, më datën 5 maj, pas luftës me koronavirusin Covid-19. Ai gjendej prej disa ditësh i intubuar në spitalin covid “Shefqet Ndroqi”, Tiranë. Guljem Radosë i ishte akorduar çmimi “Artist i Merituar”, për kontributin e tij në skenën shqiptare.

Shuhet Guljem Radoja, humb betejën me Covid 19

Ndahet nga jeta Guljem Radoja, aktori brilant i roleve të spikatura në kinemanë shqiptare. Aktori 75-vjeçar luftoi me covid-19, pa mundur ta fitonte dot betejën. Ai ndodhej i intubuar në spitalin Shefqet Ndroqi në Tiranë, pasi kishte gati një muaj që po përballej me virusin në spitalin e Durrësit, qytet edhe ku jetonte.

Ditë më parë, për Guljemin, disa nga miqtë e tij të skenës shqiptare i bën thirrje shtetit shqiptar për ta dërguar për shërim jashtë shtetit, duke mësuar gjendjen e tij të rëndë. Por mesa duket, për aktorin rrebel, me origjinë shkodrane u mbyll këtu rrugëtimi.

Është bërë e udhës të mbushim faqet e gazetave me nekrologjinë e tyre, pa mundur si gjithmonë të bëjmë asgjë sa janë gjallë.

E udhës është t’u bëjmë edhe biografinë e të rreshtojmë pasurinë që lënë për ne, të gjithë ne, me galeritë e figurave të tyre, që na rritën. E mesa duket, as ne nuk i shpëtojmë dot uniformitetit në këtë rast, edhe pse do të duhet të themi se ai ishte një nga aktorët që ishte kundër prishjes së Teatrit Kombëtar, për të cilën zakonisht nuk flitet në nekrologjitë e sotme.

Brez të tërë e kujtojnë Guljemin si Stefan Bardhi në filmin “Mësonjtorja”, apo në rolin e Petro Nini Luarasit, në filmin “Kush vdes në këmbë”, tenente Gurabardhi në filmin “Në fillim të verës”, rolin e priftit në filmin “Gjenerali i ushtrisë së vdekur”, por i pashlyeshëm edhe roli i italianit Alberto, në filmin “Gjeneral Gramafoni”.

Guljem Radoja ka punuar në disa nga teatrot e vendit: ai nisi në teatrin e Librazhdit, më pas e transferuan si regjisor në teatrin Bylis të Fierit dhe më pas në teatrin Aleksandër Moisiu të Durrësit, transferime këto, që siç ka treguar edhe vetë aktori ishin për shkak të biografisë së tij “të cënuar” në kohën e diktaturës.

Edhe në teatër ai përmendet për rolet në dramat “Bourgeois Wedding” e Bertold Brehtit, “Me syrin e një klouni” e Heinrich Bellit, “Trojanët” e Vasilis Theodoropulosit etj.

U prehsh në paqe, Guljem Radoja!

3 maji, Dita Ndërkombëtare e Lirisë së Shtypit

Në ditën kur liria e mediave të pavarura dhe të lira është më thelbësore se kurrë, liria e shtypit vazhdon të jetë e kërcënuar.

Dita Ndërkombëtare e Lirisë së Shtypit e vitit 2021, që është përkujtohet çdo 3 maj, ka në qendër përkujtimin e gazetarëve të vrarë dhe në fokus gazetaret gra prapa lajmeve dhe në vijat e frontit.

Përfaqësuesi i Lartë i BE-së, Josep Borrell, tha se gazetarët vazhdojnë të përjetojnë kushte të vështira pune me rritjen e presioneve financiare dhe politike, mbikëqyrjes, dënimeve arbitrare me burg ose dhunës për të kryer punën e tyre.

Sipas Observatorit të Unesco-s, 76 gazetarë janë vrarë që nga viti 2020, ndërsa shumë të tjerë janë arrestuar, ngacmuar ose kërcënuar në të gjithë botën. Një shqetësim i veçantë është dhuna me bazë gjinore që synon gazetaret femra.

“Liria e shtypit është një vlerë themelore për Bashkimin Evropian, mbështetur nga shumë nisma të kohëve të fundit. Liria e medias dhe siguria e gazetarëve janë përparësitë kryesore të planit të ri të veprimit për të drejtat e njeriut dhe demokracisë dhe të planit të veprimit për demokracinë evropiane”.

Në vitin 2020, më shumë se 400 gazetarë përfituan nga mekanizmi i BE-së për mbrojtjen e atyre që mbrojnë të drejtat e njeriut, ndërsa BE ndërmori veprime të rëndësishme për të mbështetur gazetarët, mediat e pavarura dhe luftën kundër dezinformimit në kontekstin e pandemisë në shumë rajone.

BE është e vendosur të bëjë më shumë, në Evropë dhe jashtë saj, vazhdon deklarata. BE do të vazhdojë të koordinojë me organizatat dhe mekanizmat ndërkombëtarë dhe të hapë rrugën për qasje të reja. Një shembull është propozimi i Komisionit Evropian për një ligj të shërbimeve dixhitale që synon mbajtjen e platformave kyçe të përgjegjshme për t’i bërë sistemet e tyre më të drejta, më të sigurta dhe më transparente.

BE gjithashtu do të vazhdojë veprimin e saj për të luftuar dezinformimin dhe do të kërkojë me të gjithë partnerët, mjete efektive për të mbështetur modele të qëndrueshme biznesi për media të pavarura.

Liria e shtypit do të thotë siguri për të gjithë“, përfundon deklarata.

Dita Botërore e Lirisë së Shtypit, 3 maj u deklarua nga Asambleja e Përgjithshme e Kombeve të Bashkuara në 1993. Dita rrit ndërgjegjësimin për rëndësinë e lirisë së shtypit dhe u kujton qeverive detyrën e tyre për të respektuar dhe mbështetur të drejtën e lirisë së shprehjes të parashikuar në nenin 19, Deklarata Universale e të Drejtave të Njeriut e vitit 1948.

Liria e shprehjes nënkupton respektimin e opinioneve të të tjerëve. Në Bruksel, dita mbahet mend çdo vit si Dita e Ndryshimit, sepse njeh ndryshimin në njerëz dhe besimet e tyre.

Mijëra persona në koncertin e parë rock post-Covid, rezultatet e eksperimenti të zhvilluar në Barcelonë

Një eksperiment i zhvilluar për të parë në mënyrë shkencore nëse është koha për të rifilluar, pas mbylljes së dytë Covid. Shumë të rinj me maska, ​​por pa distancime shoqërore. Sipas gjetjeve të para shkencore, në mesin e 4500 njerëzve të pranishëm, vetëm (mbase) dy të infektuar

Imazhet dëshmojnë një spektakël surreal. Pas një viti lockdoëni dhe ngecjet nëpër të, kemi harruar tashmë të jemi prezent në turma “të çmendura”, si këto të koncerteve rock. Por ja që, imazhet e koncertit të parë rock post-pandemik japin shumë shpresë. Eksperimenti u mbajt një muaj më parë në Barcelonë për të kuptuar nëse është koha për të rifilluar edhe sektori muzikor dhe shfaqjet live.

Mijëra njerëz pranë njeri-tjetrit, pa distancë fizike, që këndojnë e vallëzojnë. Sipas rezultateve të para shkencore pas ngjarjes, praktikisht nuk kishte asnjë të infektuar. Eksperimenti u krye në Barcelonë dhe ishte një nga tubimet më të mëdha në Evropë që nga fillimi i pandemisë. Më 27 mars, banda spanjolle Love of Lesbian performoi në koncert në Palau Sant Jordi.

Pjesëmarrësve iu kërkua t’i nënshtrohen një testi antigjen, disa orë para fillimit të koncertit, për hulumtimin e koronavirusit dhe të gjithëve iu dha një maskë e re Ffp2, për t’u vendosur gjatë gjithë kohës që do të zgjaste koncerti. Distancimi fizik nuk u kërkua. Në ndërtesë, një sistem ventilimi siguronte shkëmbimin e duhur të ajrit.

Në 14 ditët në vijim, 6 raste pozitive u diagnostikuan në mesin e 4,592 njerëzve që morën pjesë në koncert, të gjithë me shenja të lehta ose asimptomatike. Për 4 nga 6 rastet u vërtetua se rasti i infeksionit nuk ishte koncerti live. Më e rëndësishmja, asnjë nga të 6-të nuk e transmetoi virusin tek askush tjetër i pranishëm. Pra, nga gati 5000 pjesëmarrës, ata që do të kishin kontraktuar Covid-19 gjatë koncertit, do të ishin ndoshta dy.

Një eksperimenti tillë nuk ndodh për herë të parë, kujtojmë këtu atë që u zhvillua rreth një muaj më parë në Hollandë, në fshatin Biddinghuizen, afër Amsterdamit.

Ky eksperiment i dytë shënon edhe një tjetër sukses. Asokohe nuk ishte një koncert, por një ngjarje muzikore me stenda ku mund të konsumohej ushqim dhe pije.

Sidoqoftë, këto janë dy lajme jashtëzakonisht pozitive pasi, në një fazë në të cilën po flitet për variantin e njëmbëdhjetë (atë indian), ne po kuptojmë se mbase do të duhet të jetojmë me këtë virus më shumë sesa pritej.

Nga ana tjetër është një shenjë shkencore që na jep shpresën e rinisjes së lëvizjes për t’u rikthyer në normalitetin e kaq shumë pritur, me ose pa maska.

Duajeni Tokën! 22 prill 2021- Dita Ndërkombëtare e Tokës. Ja çfarë duhet të dini për të falenderuar planetin tonë!

Ndërsa toka përgjaket çdo ditë, atmosfera është ngrohur së tepërmi për shkakun tonë, akujt po shkrihen dhe ajri po ndotet edhe më shumë, sot do të duhet të festojmë Ditën Ndërkombëtare të Tokës.

Dita e Tokës 2021 ka bërë të ndizen reflektorët në të gjithë botën, për të parë se çfarë aktivitetesh do të ndodhin pikërisht në këtë ditë, ndërkohë që tema e ditës është “Restore our Earth”, pra “Rikthe Tokën tonë”.

U duk se lockdoën-i do të përmirësonte situatën e Tokës, madje pati disa shifra të përmirësimit të cilësisë së ajrit, por gjithçka shkoi në vend, në mos u bë më keq.

Çdo vit, më shumë se një miliard njerëz angazhohen dhe vihen në lëvizje për Ditën Botërore të Tokës në aktivitete të ndryshme.

Po e fyejmë dhe dëmtojmë Tokën nga të gjitha anët, ndaj një ditë e gelbër në të mirën e Tokës është gjithmonë e mirëseardhur. Edhe pse mbetet vetëm një ditë, ndërkohë që dëmtimet janë çdo ditë.

Çfarë është Dita e Tokës?

Ishte amerikani John McConnell, aktivist i paqes, që bën propozimin e parë për Ditën e Tokës në 1969-ën, në Konferencën e UNESCO-s në San Francisco, ndërkohë që kishte krijuar Earth Society Foundation në mbrojtje të Tokës sonë. Ai propozoi një ditë kushtuar planetit tonë për të promovuar paqen dhe për të rritur ndërgjegjësimin e qenieve njerëzore mbi nevojën për të ruajtur ekosistemet dhe për këtë arsye të gjitha format e jetës në planetin tonë Tokë.

E para Ditë ndërkombëtare e Tokës zyrtarisht u caktua në datën 21 mars 1970, ditë kur u nënshkrua nga 36 udhëheqës botëror, një list parimesh dhe përgjegjësish për kujdesin ndaj Tokës.

Më pas, senatori amerikan Gaylord Nelson vendosi ngjarjen duke e strukturuar atë si ngjarje universale ekologjike dhe ambientaliste.

Gjithsesi, do të ishin rrjetet sociale ato që e kthyen ditën e shënuar në turbo sociale e jo vetëm. Në vitin 2000, vetëm me kalimin e fjalës “gojë më gojë”, e kemi fjalën gjithmonë në rrjetet sociale, u përfshin mbi 5.000 grupe ambientaliste jashtë Shteteve të Bashkuara.

Edhe njerëz të famshëm iu bashkuan kauzës, e në krye do të gjendej Leonardo DiCaprio dhe këtu është rasti të kujtojmë mbështetjen e tij për mbrojtjen e lumit tonë Vjosa nga shkatërrimi.

Të shumta kanë qenë protestat e shoqërisë civile dhe aktivistëve ambientalistë, së cilës i janë bashkuar edhe artistë e emra të njohur shqiptarë në mbrojtje të lumenjve. Vlen të përmendim aktivitetet e titulluara “Mos ma prek Vjosën” apo “Mos ma prek Valbonën”, për të sensibilizuar shqiptarët në lidhje me rëndësinë e lumenjve tanë dhe kundër shkatërrimit të tyre për ngritje hidrocentralesh pa kriter.

Sot jemi në 51-vjetorin e kësaj dite, e cila tashmë i zhvillon aktivitetet gjithmonë në 22 prill të çdo viti.

Sigurisht që në vendin tonë nuk pritet të ketë aktivitete të shumta zyrtare, për shkak edhe të kulmit të fushatës elektorale, por kemi informacionin se një aktivitet me këtë rast po organizohet nga qendra Ten, e cila ka ngritur një panel me 5 personazhe të profesioneve të ndryshme, për të folur me të rinj, lidhur me situatën e Tokës sonë dhe se çfarë do të duhet të bëhet lidhur me këtë.

Çfarë është Timelapse në Google Earth?

Nëse duam të kuptojmë se si ka ndryshuar Toka, në kohë në ndihmë na vjen një funksion i ri në Google Earth, ku përdoruesit mund të jenë dëshmitarë të gati katër dekadave të ndryshimit në të gjithë planetin.

Përditësimi është bërë i mundur falë të dhënave të hapura të siguruara nga programi i Bashkimit Evropian, Copernicus, dhe satelitët e tij Sentinel, si dhe nga NASA dhe programi Landsat i Geological Survey të Shteteve të Bashkuara, do të tregojë prova vizuale të ndryshimeve drastike, që po ndodhin në botën tonë. Këtu përfshihen efektet e ndryshimit të klimës dhe sjelljet njerëzore.

Përdoruesit tani mund të fillojnë një udhëtim nëpër botë, duke eksploruar ndryshimin e formave të brigjeve, duke ndjekur rritjen e qendrave të banuara urbane me gjithë dëndësine e tyre, duke monitoruar shpyllëzimet dhe shumë më tepër.

Për secilën temë, Google Earth do të drejtojë një turne udhërrëfyes për të kuptuar më mirë ndryshimet në planet dhe si i përjetojnë njerëzit ato.

Doodle i Google në Ditën Ndërkombëtare të Tokës

Sikurse është bërë e udhës, Google shpalos herë pas here ndjeshmërinë e platformës lidhur me ditë të ndryshme të shënuara në historikun botëror.

Edhe kësaj here, Google ka publikuar doodle-n e saj green, për të përkujtuar Ditën Ndërkombëtare të Tokës dhe për të sensibilizuar sa më shumë popullsinë e gjithë planetit që ka akses në internet.

Përgjaket kryeqyteti në muajin e shënuar të Ramazanit

Ngjarje e paprecedentë ka përgjakur sot kryeqytetin. Një shtetas shqiptar i quajtur Rudolf Nikolli ka hyrë në xhaminë “Dine Hoxha” të rrugës së Kavajës me një thikë në dorë, duke shkaktuar plagosjen e 5 besimtarëve myslimanë.

Besimtarët gjendeshin në xhami për të kryerr ritet e tyre fetare, ndërkohë që sapo ka nisur muaji i Ramazanit.

Agersori ka qëlluar që në hyrje të xhamisë ku ka hasur pengesën e parë për të hyrë, e më pas ka goditur edhe besimtarët e tjerë.

foto të Dosja.al

Më pas Nikolli është ndaluar nga besimtërët, të cilët ia kanë dorëzuar atë forcave të Policisë së Shtetit.

Kjo e fundit thekson se ka nisur hetimet për zbardhjen e ngjarjes, ndërkaq që i ati i 34-vjeçarit pohon për shqetësime mendore të të birit. Sipas tij ai ishte frekuentues i një xhamie, gjë që e pohon edhe Ahmet Kulla, mezini i xhamisë së Klosit, i cili për Report Tv thekson se para depresionit Rudolfi ka qenë djalë i qetë dhe i sjellshëm dhe frekuentonte rregullisht xhaminë.

Nuk dihet ende çfarë e ka shtyrë djalin nga Burreli të përgjaki muajin e rëndësishëm të Ramazanit, por 5 personat e plagosur prej tij gjenden jashtë rrezikut për jetën. I gjithë komuniteti mysliman kërkon me anë edhe të drejtuesve të tij më të lartë zbardhjen e ngjarjes. Kështu, kryetari i Komunitetit Mysliman të Shqipërisë, Bujar Spahiu ka reaguar në rrjetin e tij social zyrtar me një deklaratë në të cilën i kërkon Policisë së Shtetit të zbardhë sa më shpejt ngjarjen.

Ndërkohë kanë nisur të bëhen deklarata zyrtare solidarizuese në mbështetetje të komunitetit mysliman.

Kryetari i Konferencës Ipeshkvnore të Shqipërisë, monsignor Angelo Massafra, i ka drejtuar një letër kryetarit të Komunitetit Mysliman të Shqipërisë, zotit Bujar Spahiu në të cilën shpreh keqardhjen e thellë për ngjarjen tronditëse. Ai uron paqe dhe që ngjarja të zbardhet sa më parë.

“I lutemi Zotit për ju të gjithë, që po jetoni edhe muajin e Ramazanit, për të plagosurit, për komunitetin tuaj e të gjithë shqiptarët që paqja dhe e mira të mbretërojë në zemrat tona e që ngjarje të tilla të mos përsëriten më. Zoti na bekoftë të gjithëve!”, mbyllet kështu letra në emër të kishës katolike.

Covid: Ja çfarë ndodh në mendjen e atyre që shërohen nga virusi

Krahasuar me ata që shërohen nga një grip normal, pacientët me Covid kanë një mundësi 44% më të lartë për të zhvilluar gjendje psikiatrike, psikologjike ose neurologjike

Studime të shumta të së kaluarës tashmë kanë gjetur lidhje midis Covid dhe shëndetit mental. Tani, falë hulumtimit më të gjerë të bërë ndonjëherë mbi këtë temë, dyshimet janë edhe më të pakta. Sipas ekspertëve, të cilët botuan zbulimet e tyre në revistën “Lancet Psychiatry”, një në tre persona që kapërcejnë sëmundjen e shkaktuar nga Coronavirus, diagnostikohen me gjendje neurologjike dhe / ose psikiatrike.

Studimi i tipit observativ konsiderohet shumë autoritar, pasi analizoi të dhënat mjekësore të rreth 230.000 pacientëve që kishin pasur Covid-19, duke i krahasuar ato me shumë kartela mjekësore që u përkasin subjekteve të rikuperuar nga sindromat e zakonshme të gripit dhe sëmundjet e frymëmarrjes. Akademikët u përpoqën të kuptonin lidhjen midis sëmundjes dhe disa kushteve neurologjike, psikiatrike dhe psikologjike: hemorragji cerebrale, goditje në tru, Parkinson, Sindroma Guillain Barre, demencë, psikozë, çrregullime të humorit dhe çrregullime të ankthit.

Çfarë ndodh me mendjet e ish-pacientëve me Covid?

Së pari, ekspertët zbuluan se demenca dhe goditja në tru ishin ndoshta për shkak të ndikimit të zakonshëm biologjik të virusit në trup; sa i përket Sindromës Parkinson dhe Guillan Barre (një polineuropati akute inflamatore), nuk u shfaq asnjë korrelacion me Covid (as gjatë dhe as pas sëmundjes). Sa i përket problemeve të tjera, megjithatë, rezultatet ishin befasuese: krahasuar me pacientët që vuanin më parë nga një sëmundje e frymëmarrjes normale, ata që u rikuperuan nga Covid kishin 16% më shumë shanse për të zhvilluar të gjitha patologjitë e tjera psikiatrike, psikologjike dhe neurologjike; kjo përqindje është rritur në 44% në krahasim me pacientët që kanë lënë pas një grip klasik.

Ankthi dhe pasojat nga Covid

Më saktësisht, çrregullimet e humorit, ankthi dhe çrregullimet psikologjike prekën 24% të ish-pacientëve Covid të marrë në konsideratë. Ata të shtruar në kujdes intensiv ishin më të ekspozuarit ndaj këtyre problemeve: 46%, brenda gjashtë muajve nga shërimi, shfaqën probleme neurologjike, psikologjike ose psikiatrike:

“Studimi ynë konfirmon dyshimet se një diagnozë Covid -19 nuk ka të bëjë vetëm me simptomat e frymëmarrjes, por gjithashtu edhe me problemet psikiatrike dhe neurologjike. Dhe pasojat mund të shfaqen shumë më vonë sesa pritej”, shpjegon për BBC-në profesoresha Dame Til Wykes e Institutit të Psikiatrisë, Psikologjisë dhe Neuro-shkencës nga King’s College i Londrës.

Covid pëson përsëri mutacion. A do të kenë efekt vaksinat për variantin e ri japonez?

Sipas ekspertëve britanikë, koronavirusi do të bëhet endemik: vaksina e kombinuar me antigripalët.

Mutacioni i fundit i Sars-CoV-2 u regjistrua në Japoni, në qytetin e Tokios. Varianti “Eek” shqetëson gjithashtu Evropën: sipas asaj që raportohet nga transmetuesi publik japonez NHK, 70% e pacientëve të infektuar me koronavirus dhe të testuar në mars në një spital në kryeqytet, ishin goditur nga varianti E484K, i quajtur “Eek”.

Të kërcënuar nga mutacioni i ri u gjetën 10 nga 14 njerëz që u testuan pozitivisht. Ndërkohë, agjencia e lajmeve Reuters vuri në dukje se, në dy muajt e fundit, 12 nga 36 pacientë Covid kanë kryer mutacionin. Askush prej tyre nuk kishte udhëtuar së fundmi jashtë vendit dhe as nuk kishte pasur kontakte me njerëz të infektuar me E484K.

Kjo do të thotë, të paktën në teori, se varianti Eek aktualisht është mbajtur i bllokuar në kufijtë japonezë. Duket se Eek është në gjendje të shpëtojë si nga antitrupat e gjeneruar nga një infeksion i mëparshëm Covid, ashtu edhe nga vaksinat e zhvilluara deri më tani.

Sikur të mos mjaftonte, fushata e vaksinimit në Japoni ende nuk ka dalë drejtpërdrejt. Qeveria japoneze është e alarmuar: buletinet e fundit përshkruajnë një situatë epidemiologjike që do të duhet të monitorohet me vëmendje të jashtëzakonshme. 446 raste të reja u regjistruan në Tokio, të premten. Një vlerë e jashtëzakonshme, por ende nën pragun e 2.500 infeksioneve të zbuluara janarin e kaluar. Në Osaka, u shfaqën 666 (rekord) raste. Në qytetin e fundit, ekspertët shprehën shqetësimin për përhapjen e llojit britanik.

Ndërkohë në Mbretërinë e Bashkuar po planifikohet një dozë e tretë, pasi mendohet se Koronavirusi i ri do të bëhet endemik, domethënë ai do të rishfaqet në mënyrë ciklike në valë si një grip normal. Për këtë arsye po planifikohet të organizohet një vaksinim vjetor i gripit i kombinuar me vaksinimin anti-Covid (e ashtuquajtura doza e tretë) çdo vjeshtë, duke përdorur një vaksinë të rifreskuar me variantet më të fundit në qarkullim, ashtu si me virusin e gripit, i cili përsëritet çdo vit dhe rregullisht ndryshon, duke kërkuar formulime të reja vaksinash çdo herë.

Por, për sa kohë mbron vaksina?

Përgjigja vjen nga provat klinike të Fazës 3 të vaksinës anti-Covid me Rna të prodhuara nga Pfizer / BioNTech, e cila konfirmoi, me rastin e kontrolleve gjashtëmujore, mbrojtjen e vlefshme të serios. Pas administrimit të dozës së dytë, ajo ka një efikasiteti i 100% ndaj variantit të Afrikës së Jugut të koronavirusit (B.1.351) me mbrojtje që mund të zgjasë me vite, tha Scott Hensley, një imunolog në Universitetin e Pensilvanisë (SHBA), i cili ka studiuar vaksinat e ARN-së Pfizer dhe Moderna:

“Ne kemi nivele të larta të antitrupave dhe ka mbrojtje të konsiderueshme edhe ndaj varianteve”.

1 Prilli, Dita Ndërkombëtare e Gënjeshtrave. Të vërtetat e ditës së gënjeshtrave.

 Filluat me gënjeshtrat sot, apo mendoni të lini ndonjë ditë pushim?! Sot është dita ndërkombëtare e gënjeshtrave ose ndryshe dita e shakave. Dhe shaka le të jetë!

 Në fakt nuk kemi faj, si ta kuptojmë të vërtetën pa gënjeshtrat?!

 Por si është krijuar dhe përhapur ndër vite dita e shakave?

Për këtë ka katër hipoteza:

– Në Evropën Veri-perëndimore, sezoni i peshkimit fillonte në 1 prill. Në këtë periudhë të vitit, kapja e peshqve ishte shumë e vështirë. Si rrjedhojë, peshkatarët gënjenin duke u mburrur se kapnin shumë peshq. Me kalimin e kohës, ky gjest u bë zakon.

-Sipas disa historianëve, në antikitet ka pasur festivale të oragnizuara për ditën e gënjeshtrave. Romakët festonin për nder të perëndeshës Venus. Njerëzit, ato kohë, i shihnin festimet si një mundësi për të shprehur veten në liri të plotë.

-Të tjerë e lidhin ditën e gënjeshtrave me kalendarin e vjetër Julian, ku 1 prilli shënonte fillimin e vitit solstik pranveror.

-Ndërsa sipas hipotezës së fundit, shakaja e 1 prillit vjen nga mbreti francez Karl IX, i cili vendosi ditë të parë të vitit të ri 1 janarin. Ndërkohë, francezët vazhdonin të festonin  vitin e ri më datën 1 prill deri më 1564-ën. Si rrjedhojë, pjesa tjetër e shoqërisë i ngacmonte, çdo 1 prill. Ngacmim i cili, me kalimin e kohës, u shndërrua në zakon, gjë që përcaktoi edhe 1 prillin si festën e tij.

Por kjo ditë nuk ka të njëjtin kuptim në të gjithë botën.

Në Skoci njihet si dita e njerëzve egoistë, ndërsa në Iran i referohet një festivali kulturor, me këngë, valle dhe lojra.

Në Meksikë dita e gënjeshtrave festohet më 28 dhjetor, sipas traditës nëse jep hua në ditën e gënjeshtrave, nuk je i detyruar të kthesh borxhin e marrë.

Në Poloni janë tipike lojërat dhe shakatë.

Në Francë, njerëzit i ngjisin njëri-tjetrit në shpinë, letra në formë peshku, kurse në Filipine, shakaxhinjtë lyejnë me dyll të pasmet e “viktimave” të tyre.

a young caucasian man seen from behind with a paper fish attached to his back, as a popular prank for april fools day in countries such as Italy, France, Belgium, Netherlands, Switzerland or Canada

“Gënjeshtrat” e 1 prillit, që dolën të vërteta

  -Van Halen ka qenë një nga grupet rock më të njohura në 1985, kështu që lajmi i liderit të grupit, David Lee Roth, se do të largohej nga banda, më 1 prill të atij viti, nuk u mor seriozisht. Por ja që ishte e vërtetë.

 -Selena Quntanilla Perez u vra më 31 mars 1995, por dita pasardhëse, ndikoi te miliona fansa për të mos e besuar lajmin e vdekjes së këngëtares.

 -Në 1 prill të 2004, Google bëri të ditur daljen e versionit beta dhe një shërbimi të ri emaili të quajtur, Gmail. Për shkak dhe të ditës, kjo dukej si fantazi, sidomos fakti i të pasurit një memorje prej 1 GB në email. Në një kohë kur shërbimet më të njohura Yahoo dhe Hotmail ofronin vetëm 2 MB dhe 4 MB përkatësisht.

-1 prilli i Metës dhe Ramës, në 2013-ën, ishte dita kur dy drejtuesit e partive politike vendosën të bashkohen në koalicion kundër Partisë Denokratike, parti me të cilën Ilir Meta qeveriste prej 4 vitesh. Koalicioni u përfol shumë dhe u vu në dyshim edhe për shkak të datës. Por ja që rezultoi i vërtetë.

Gënjeshtrat më të famshmë në mbarë botën.

-Në 1957, mijëra shikues besuan një raport të publikuar nga BBC, sipas të cilit shkencëtarët kishin zbuluar në Zvicër, pemë që prodhonin makarona.

 -Në 2012, Louis Tomlinson i grupit muzikor One Direction, gënjeu fansat, duke u thënë se do të bëhej baba.

-Edhe mediat krijojnë lajme të rrejshme në 1 prill. Në 1878, gazeta New York Graphic botoi lajmin për një makinë që shndërron dheun në drithëra dhe ujin në verë me një lëvizje të vetme. Problemi i urisë globale ishte zgjidhur, madje duke ia atribuar zbulimin Thomas Edisonit.

– Në vitin 1940, Instituti Franklin njoftoi se të nesërmen do të vinte fundi i botës. Sigurisht, njerëzit u panikosën dhe, menjëherë, punonjësi që kishte shpikur gënjeshtrën, u pushua nga puna.

Çfarë ndodh sot me shakatë?

Sipas sociologëve e psikologëve, shakatë janë bërë të rralla në jetën e përditshme. Si rrjedhojë e kohës gjithnjë e më të pakët në dispozicion dhe ritmit të punës. Duket se jemi shumë larg shakave të antikitetit dhe më afër gënjeshtrave. Në ditët e sotme kërkohet hiper-vëzhgim për të kuptuar, nëse dikush po thotë të vërtetën apo jo. Kështu që, le të bëjmë të gjithë përpjekje për t’i minimizuar sado pak gënjeshtrat.

Dhe për ta mbyllur, një këshilë: Boll e lexuat revistën tonë!

Shakaaa. Gëzuar Ditën e Gënjeshtrave!