Kevin Spacey rikthehet në sheshxhirim, pas akuzave për ngacmim seksual, me një temë pikante

E kemi parë si emblemën presidenciale në “House of Cards”. Por menjëherë, pa u mbaruar mirë seriali së xhiruari, i përgatitën një dalje nga skena, gati e panatyrshme. E detyruar, sigurisht, pasi u akuzua për molepsje seksuale. U duk se këtu mori fund edhe shkëlqimi i karrierës së tij, po të mos qe për regjisorin italian Franco Nero. Pas tre vjetësh “i lënë në harresë”, për shkak të skandaleve në lidhje me ngacmimin e fëmijëve (dhe jo vetëm), aktori amerikan, dy herë fitues i Oskar, kthehet në skenë për të luajtur me Franco Neron. Tema e filmit është tepër pikante, një rast (i pretenduar) pedofilie

Kthimi në sheshxhirim i Kevin Spacey

Kevin Spacey, 61 vjeç, duket se nuk e ka shkruar ende “the end”-in e tij. Do të jetë ftesa e regjisorit Franco Nero që e do patjetër në filmin e ri të tij. “The man who drew God” është filmi që pret Kevinin në Torino. Titulli italian i filmit është “L’uomo Che Disegno Dio“. Së bashku me të do të luaj edhe vetë regjisori dhe gruaja e tij, Vanessa Redgrave.

“Jam shumë i lumtur që Kevin ka pranuar të marrë pjesë në filmin tim. Unë e konsideroj atë një aktor të shkëlqyeshëm dhe mezi pres të filloj ”, ka thënë Nero për ABC News, në lidhje me këtë propozim.

Franco Nero
Kevin Spacey i dëbuar nga Hollywood

Ishte shpërthimi i “Me too”, dhe pikërisht viti 2017, kur fituesi i dy Oskarve u mënjanuar nga bota e Hollivudit. Anthony Rapp, një aktor që ka luajtur në Star Trek, pretendoi se ishte ngacmuar nga ylli në vitet 1980, kur ai ishte vetëm katërmbëdhjetë vjeç.

Akuzat e Rapp u pasuan nga ato të tridhjetë personave të tjerë, të cilët pretenduan se ishin ngacmuar nga Spacey në të kaluarën e tyre.

Ndër pretendimet më serioze, madje ishte edhe ai i William Little, një kamerier 18-vjeçar në një lokal të Nuntucket-it, i cili kishte sjellë mbështetjen e provave. Por, në një moment, i riu kishte tërhequr akuzën e tij në mënyrë misterioze.

Gjashtë akuza të tjera kanë të bëjnë me periudhën “angleze” që shkon nga viti 1996 në 2013. Për këtë “sjellje të keqe”, Spacey u pezullua nga “House of Cards”. Ndërsa skenat e xhiruara për filmin “All the Money in the World” u anuluan dhe u xhiruan nga fillimi me Christopher Plummer.

Rikthimi me një temë pikante

Ajo që bën më shumë përshtypje nga rikthimi i Spacey në botën e kinemasë, është pikërisht tema e filmit të ri që i është propozuar. Dhe besojeni apo jo, filmi ka si temë pedofilinë. Kevi Spacey do të luajë rolin e një hetuesi në filmin më të ri të Neros. Një hetues, të cilit i është ngarkuar një rast pedofilie. Ndërkaq Franco Nero, aktor i dashur edhe për shqiptarët, dhe regjisor i filmit, do të luajë rolin e një artisti të verbër, i cili akuzohet padrejtësisht për ngacmime seksuale.  

“Friends” më në fund e caktuan datën e ritakimit, ja kur do të shfaqet seria e mezipritur

Më në fund ka një datë amerikane për ribashkimin e shumë pritur të Miqve (Friends). Më 27 maj 2021, abonentët e Hbo Max, platforma ekskluzive e transmetimit, do të mund të shohin “The One Where They Get Back Together”, episodi që do t’i risjellë përsëri e për herë të parë bashkë, pas finales së serisë 2004.

Siç është njoftuar gjerësisht, episodi do të jetë “i pashkruar”, që do të thotë se nuk do të jetë një vazhdim të serialit, por një speciale që do të shohë gjashtë aktorët kryesorë të kthehen në Stage 24, të Warner Studios në Burbank, studioja që priti të dhjetë sezonet e trillit të suksesshëm.

Jennifer Aniston, Courteney Cox, Lisa Kudrow, Matt LeBlanc, Matthew Perry dhe David Schwimmer kanë rënë dakord të kthehen së bashku para kamerave, për të ndarë kujtimet e atyre dhjetë viteve në të cilat kamerat e kishin kokën të ulur, dhe të festojnë suksesin e një serie televizive që, në sajë të ardhjes së platformave streaming, është zbuluar edhe nga brezat e rinj.

Data e lëshimit të kësaj specialieje nuk është e rastësishme: 27 maji në të vërtetë do të jetë ditëlindja e parë e Hbo Max, i cili kishte njoftuar ribashkimin si një nga pikat e forta të tij, dymbëdhjetë muaj më parë. Fatkeqësisht, siç e dimë të gjithë, pandemia ka shtyrë xhirimet, të cilat u zhvilluan vetëm muajt e fundit.

Bashkimi do të drejtohet nga Ben Winston; të gjashtë aktorët janë gjithashtu prodhues ekzekutiv të specialit, së bashku me krijuesit e sitcom Marta Kauffman dhe David Crane dhe producentin ekzekutiv Kevin Bright. Por të gjashtët e Central Perk nuk do të jenë vetëm.

Hbo Max, në njoftimin e datës së shfaqjes së parë të ribashkimit, njoftoi edhe listën e gjatë të të ftuarve që do të shfaqen gjatë programit. Disa prej tyre padyshim janë ftuar për afeksionin e tyre për serialin, të tilla si David Beckham, Justin Bieber, BTS, James Corden, Cindy Crawford, Cara Delevingne, Lady Gaga, Kit Harington, Mindy Kaling dhe Malala Yousafzai.

Në kast, megjithatë, ka edhe aktorë të tjerë që, te Friends, kanë pasur role pak a shumë të shkëlqyera: Elliott Gould (Jack, babai i Ross dhe Monica), Larry Hankin (Z. Heckles, fqinji i Monikës), Thomas Lennon (Randall, binjaku i dorës së Joey), Christina Pickles (Judy, nëna e Ross dhe Monica), Tom Selleck (Richard, i dashuri i Monikës) dhe Reese Witherspoon (Jill, motra e Rachel). E fundit, por jo më pak e rëndësishmja, prania e James Michael Tyler (Gunther legjendar) dhe Maggie Wheeler (Janice po aq legjendare) duhet gjithashtu të përmendet.

Çmimet David di Donatello 2021: Checco Zalone fiton çmimin i veshur “me pizhama”, ca thashetheme për tapetin e kuq

Sado që më shumë një ngjarje kombëtare, nuk na lë dot indiferent festa e shpërndarjes së çmimeve të kinematografisë italiane. Një Itali që e kanë zili në të gjithë botën për artin dhe kulturën, nuk mund të mos jetë në qendër të vëmendies edhe në një event të tillë.

Dje mbrëma u zhvillua spektakli i shpërndarjes së statujave David, për kinematografinë italiane. Duke qenë se në vendin fqinj ka vetëm pak ditë që janë liruar masat anti-covid, ngjarja u zhvillua nën masa të kujdesshme dhe kështu që në dy salla dhe u prezantua nga Carlo Conti.

Të gjithë gjigandët e kinemasë italiane ishin aty, ishte e madhja Sofia Loren, Sandra Millo, e cila mori çmimin e karrierës, e deri te më e reja Matilda de Angelis. Madje edhe Laura Pausini, që për pak sa nuk mori një Oskar për këngën më të mirë të filmit.

Nëse skenën e David di Donatello 2021 e pa më shumë fituesi i tre statuetave, filmi “Volevo Nascondermi” nga Giorgio Rights, me Filmi më i Mirë, Regjia më e Mirë dhe Aktori më i Mirë (Elio Germano), tapetin e kuq e populluan të gjithë me një dëshirë të madhe dhe me distancim sigurisht.

Por para se të shkojmë te tapeti i kuq, çfarë ishte më shumë për t’u shënuar nga spektakli, do të ishte patjetër Checco Zalone, që edhe në këtë rast zyrtarë e serioz, nuk mund të na linte pa na bërë të qeshim me batutat e tij.

Pak siç së fundi po ndodh, kujtojmë rastin e Oskarit të Anthony Hopkins, e mbase edhe fare rastësisht, se ndoshta mendonte që çmimin mund ta merrte Laura Pausini, Checco e mori çmimin nëpërmjet lidhjes internetike dhe thuajse me pizhama (në fakt me një t-shirt normal). Në lidhjen e bërë, ai pranoi se i erdhi i papritur çmimi dhe se e gjithë familja e tij ishte duke fjetur e as që i bëhej vonë se çfarë çmimesh merrte.

“Po ta dija do të vija. Familjes sime as që i bëhet vonë nëse fitoj çmime… falenderoj Akademinë për çmimin e merituar”, e mbylli ai duke shkaktuar si gjithmonë të qeshura në sallë. Checco mori çmimin e Këngës më të Mirë, pjesën Immigrato, për filmin e tij “Tolo, tolo”.

Edhe një herë tjetër Laura Pausini u nda pa çmim, edhe pse ishte veshur si anëtare jurie që do të duhej të jepte çmime, me kostumin Valentino.

Sa i përket tapetit të kuq, u duk se mbizotëronin pantallonat dhe sidomos jumpsuit-et, gjithsesi mediat italiane i quajtën mesatare dhe stil british, veshjet e këtij tapeti.

Micaela Ramazzotti u pa të parakalojë me një veshje nga Gucci, të stilit të viteve ’80, me mëngët e gjera e të fryra.

Ndërkohë që Sophia Loren kishte zgjedhur “strategjinë” Marlene Dietrich, nga Armani Privé që shënjonte ato harqet e saj të kujtimeve rinore. Por çmimi Aktorja më e Mirë, për të dytën herë, i shkonte shumë me shpirtin e saj. 

Në antipodë, mbretëresha e vitit të kinemave të mbyllura, të Sanremos dhe të Netflix, Matilda De Angelis kishte zgjedhur një veshje të thjeshtë Prada me rripa. I thjeshtë, por edhe ai me një lidhje precize me historinë e kostumeve dhe kinemasë: në nder të Anna Magnani.

Vittoria Puccini me një fustan Valentino dhe bizhu Bulgari, duket si një dea greke.

Alba Rohrwacher me Valentino Haute Couture, duket pak si motra e Hirushes që nuk i hyn mirë këpuca në këmbë.

Pastaj, kemi Ginevra Elkann me Guccin e saj, që përfundon me “perden e stilit barok”.

Kjo jaka në veshjen Gucci të Benedetta Porcaroli-t, nuk është se merret shumë vesh, po hajt më

Fabio e Damiano D’Innocenzo me Gucci, por seç ka një gjë që të lë të dëshiruar në të dy.

Sandra Milo me Rocco Barocco dhe me çmimin e karrierës më në fund. Kohë mbretërish të rëna nga vahti.

Claudia Gerini me Giorgio Armani Privé. Si në siklet duket, megjithatë.

Paola Cortellesi, i bukur fustani Giorgio Armani Privé, po flokët edhe mund t’i kishte krehur.

Ja marrim Diego Abatantuono, për shembull, dhe e kuptojmë se në një farë moshe s’të intereson më asgjë.

Ka edhe kështu pastaj, si Susanna Nicchiarelli me Missoni, që duket si ndërthurje e fustaneve të plazhit me zebrën. Mos më bëni të flas për sandalet.

Smoking pa hesap pastaj, por të veshura kryesisht nga gratë.  

Pietro Castellitto. Nuk e di çfarë ka dashur të thotë Dior me atë pullen, vetëm nëse e ka shtrënguar Pietro në momentin e fundit.

Elio Germano me Giorgio Armani dhe byzylykun tibetian që i solli fat.

Megjithatë, më i bukuri ishte ai, Armani, i veshur nga Pietra Detassis, Presidente dhe Drejtore Artistike e Akademisë së Kinemasë Italiane – David di Donatello Awards.

Një model i lezetshëm me jakat e rrumbullakosura dhe harkun “e vjedhur” nga Nabokov.

Monia Bellucci, siç nuk e kemi parë kurrë, merr çmimin David di Donatello 2021 të Karrierës

E bukura e dheut. Vitet ikin dhe ajo mbetet një bukuri e pacënuar. Monica Bellucci mori çmimin e Karrierës dhe gjatë ditës së djeshme u shfaq në një lidhje internetike, në ceremoninë që u organizua, për ndarjen e çmimeve David di Donatello, në prezencë të presidentit italian, Sergio Matarella.

Çmimet David janë në fakt të ngjashme me Oskarët për kinemanë italiane, dhe për këtë vit festa dhe show u zhvilluan ditën e djeshme në shtetin fqinj.

Bellucci u detyrua të lidhej në distancë, duke qenë se ndodhej në shesh-xhirimin e një filmi në të cilin merr pjesë.

Por ajo që na bën përshtypje është pamja e saj siç nuk e kemi parë kurrë. Ylli Bellucci u shfaq me flokë të gjatë biond cenere dhe një kapele, stil Ivana Spagna.

Mesa duket kjo lloj pamjeje ishte e detyruar nga roli për të cilën aktorja po punon.

Ky lloj look- në fakt nuk kaloi pa u vënë re, madje prezantuesja e ceremonisë u kujdes që t’ia përmendte e batutë në përshëndetjen e fundit me të:

“Falenderojmë Ivana Spagna-n, të cilën unë e ndjek që nga ditët e Easy Lady”, tha Geppi Cucciari, mbasi Monica bëri falenderimet e rastit për çmimin e akorduar.

Gjithsesi, Monica është Monica në çfarëdo lloj stili.

Për mbi tridhjetë vite, Monica Bellucci ka qenë ikona italiane e bukurisë në botë, e njohur si në Francë, ashtu edhe në Hollivud me prezencën e saj nëpër filma të ndryshëm.  

Ylli italian po përgatitet t’ia dorëzojë stafetën së bijës, Deva Cassel, një 17-vjeçare (bëmë mama të të ngjaj) që ka nisur të pushtojë kopertinat dhe pasarelat si modele.

Deva Cassel, vajza e Monica Bellucci

Ashtu si e ëma, Monica, në fillim të viteve ’90.

Tom Cruise kthen mbrapsht statujat e arta? Reformim në kinematografi, çfarë po ndodh me çmimet “Golden Globe”

Asnjë transmetim çmimesh në network-un NBC, që i ka transmetuar gjithmonë ato. Reforma në kinematografi ka filluar, por është e pamjaftueshme, ndërsa mister “Mision Impossibile” kthen mbrapsht çmimet tek dhënësit.

Me pak fjalë lëmsh, në një sektor të artit, i cili është përfolur më shumë nga gjithçka për shumëçka, që me Mee To e deri te Black Lives Matter.

Gjithsesi, NBC nuk do të transmetojë Golden Globe të vitit 2022. Premtimi i HFPA, Shoqata e Shtypit të Huaj, për të shtuar 20 anëtarë të rinj black deri në 2021-shin midis 87 të bardhëve, nuk u gjykua i mjaftueshëm. Për të ndryshuar seriozisht strukturën e Shoqatës që organizon çmimet, duhet “kohë dhe punë – thuhet në deklaratën e netëork-ut. Prandaj shpresojmë që organizata të punojë drejt qëllimit në mënyrë që shfaqja të transmetohet në janar 2023″.

Që kur Los Angeles Times zbuloi mungesën e gjithëpërfshirjes në Golden Globe, çmimet i kishin ditët e numëruara. Nën presionin e Time’s Up, organizata për mbrojtjen e viktimave të ngacmimeve seksuale, menjëherë u ngrit një fushatë presioni për një reformë të plotë.

Polemikat kanë të bëjnë kryesisht me një shtesë prej 20 anëtarësh nga komuniteti black, deri në 2021. Pastaj me rregulla të reja etike në lidhje me promovimet, zgjerimin e gazetarëve të kualifikuar etj.

Por duket se NBC nuk e mbajti fjalën.

Scarlet Johansson akuzon për seksizëm brenda Golden Globe

Scarlet Johansson, në një intervistë u shpreh se disa pyetje nga anëtarët e HFPA kanë qenë gati seksiste në të shkuarën.  

“Është gjithashtu një shoqatë e legjitimuar nga personazhe si Harvey Weinstein, për të grumbulluar pushtet në funksion të Oskareve. Më mirë të distancohesh nga HFPA”, u mësua të ketë thënë ajo për “Hollywood Reporter”

Tom Cruise kthen çmimet

Zëra kritikë, të rrallë edhe ka pasur, por asnjë nuk e çoi deri në fund aksionin, domethënë, të kthente çmimet mbrapsht. Por këtë duket se e bëri Tom Cruise. Ai ktheu tre statujat e arta Globe, të marra në 1990,1997, 2000, në shenjë indinjate.

Por a do të jetë i vetmi që e bën këtë? Mbetet për t’u parë.

Aq më tepër që në “muzeun e kinemasë” ka mbetur e pavdekshme skena e filmit “Klubi i grave”, në të cilin çmimi Golden Globe u quajt i shenjtë.

Shuhet Guljem Radoja, humb betejën me Covid 19

Ndahet nga jeta Guljem Radoja, aktori brilant i roleve të spikatura në kinemanë shqiptare. Aktori 75-vjeçar luftoi me covid-19, pa mundur ta fitonte dot betejën. Ai ndodhej i intubuar në spitalin Shefqet Ndroqi në Tiranë, pasi kishte gati një muaj që po përballej me virusin në spitalin e Durrësit, qytet edhe ku jetonte.

Ditë më parë, për Guljemin, disa nga miqtë e tij të skenës shqiptare i bën thirrje shtetit shqiptar për ta dërguar për shërim jashtë shtetit, duke mësuar gjendjen e tij të rëndë. Por mesa duket, për aktorin rrebel, me origjinë shkodrane u mbyll këtu rrugëtimi.

Është bërë e udhës të mbushim faqet e gazetave me nekrologjinë e tyre, pa mundur si gjithmonë të bëjmë asgjë sa janë gjallë.

E udhës është t’u bëjmë edhe biografinë e të rreshtojmë pasurinë që lënë për ne, të gjithë ne, me galeritë e figurave të tyre, që na rritën. E mesa duket, as ne nuk i shpëtojmë dot uniformitetit në këtë rast, edhe pse do të duhet të themi se ai ishte një nga aktorët që ishte kundër prishjes së Teatrit Kombëtar, për të cilën zakonisht nuk flitet në nekrologjitë e sotme.

Brez të tërë e kujtojnë Guljemin si Stefan Bardhi në filmin “Mësonjtorja”, apo në rolin e Petro Nini Luarasit, në filmin “Kush vdes në këmbë”, tenente Gurabardhi në filmin “Në fillim të verës”, rolin e priftit në filmin “Gjenerali i ushtrisë së vdekur”, por i pashlyeshëm edhe roli i italianit Alberto, në filmin “Gjeneral Gramafoni”.

Guljem Radoja ka punuar në disa nga teatrot e vendit: ai nisi në teatrin e Librazhdit, më pas e transferuan si regjisor në teatrin Bylis të Fierit dhe më pas në teatrin Aleksandër Moisiu të Durrësit, transferime këto, që siç ka treguar edhe vetë aktori ishin për shkak të biografisë së tij “të cënuar” në kohën e diktaturës.

Edhe në teatër ai përmendet për rolet në dramat “Bourgeois Wedding” e Bertold Brehtit, “Me syrin e një klouni” e Heinrich Bellit, “Trojanët” e Vasilis Theodoropulosit etj.

U prehsh në paqe, Guljem Radoja!

Për të gjithë dashnorët e Gossip Girl, lajmi i mirë mbërriti!

Episodet e reja të dramës së dashur adoleshente do të publikohen në korrik 2021, në HBO Max. Dhe ato do të karakterizohen nga gjithëpërfshirja

“Së shpejti në HBO Max, në korrik. Shënojeni në axhendën tuaj”.

Ky është postimi në Instagram, ku Gossip Girl u lë një takim fansave. Ristartimi i një prej serialeve më të dashur, i njëjti që ka shenjtëruar suksesin e Blake Lively, do të transmetohet në korrik 2021-shit.

Gossip Girl, reboot në korrik 2021

Pra, le të bëhemi gati të kthehemi në Upper East Side. Ende nuk ka datë zyrtare për episodin e parë, por muaji është konfirmuar: Në verë, pikërisht në korrik, do të shohim teen dramën e dashur nga adoleshentët dhe jo vetëm.

Showrunner Joshua Safran, i cili është duke punuar në seri së bashku me krijuesit origjinal Josh Schwartz dhe Stephanie Savage, i zbuloi Cosmopolitan-it se reboot-i shumë i pritur do të dalë në më pak se tre muaj.

Rrjetet sociale vazhdojnë

Siç është njohur tashmë, episodet e reja do të vendosen në shoqërinë e kohës sonë, të kompletuara me rrjete sociale dhe një New York ndryshe nga tetë vjet më parë. Me protagonist një grup studentësh të privilegjuar të Nju Jorkut, gjithkund nën vëzhgimin e Gossip Girl.

Në kast do të përfshihen Whitney Peak, Emily Alyn Lind, Evan Mock, Jordan Alexander, Thomas Doherty, Eli Brown, Zión Moreno, Savannah Smith dhe Tavi Gevinson

Një produkt ndryshe dhe më gjithëpërfshirës

Një vazhdim i serisë, por edhe një produkt krejt i ri: kështu do të rindizet Gossip Girl. Dhe në qendër të episodeve të reja do të jetë përfshirja.

“Unë mendoj se është e rëndësishme që një vajzë zezake të shohë dikë në një pozitë të fuqishme, për ta përfaqësuar atë”, i tha Savannah Smith Cosmopolitan-it.

“Është e rëndësishme edhe për fëmijët e periferisë ose fëmijët që nuk kanë shumë miq të zinj ose miq me ngjyrë, që përgjithësisht na shohin të përfaqësuar në mënyra të ndryshme. Unë mendoj se kjo mund të ndryshojë vërtet gjërat. Ndoshta ata nuk i mësojnë këto gjëra në shtëpi, por i shohin ato në Gossip Girl. A nuk është fantastike?”.

Një mendim tjetër u nda nga Whitney Peak: “Unë dua që të gjithë zezakët në të gjithë botën të jenë në gjendje të shikojnë shfaqjen dhe të mendojnë: ‘Ky është një person që duket si unë. Unë nuk duhet të jem ide stereotipike e asaj që jam’”.

Michelle Pfeiffer mbush 63 vjeç, por duket se i ka mbetur sahati në vend. [GALERI]

Ajo është ikonë e padiskutueshme dhe ka bërë shumë nga ne të ëndërrojnë. Të ëndërrojnë dhe t’i ngjajnë.

E kemi parë në kaq shumë filma dhe galeria e saj e roleve dhe personazheve të cilave u ka dhënë shpirtin dhe imazhin është e paharrueshme.

Michelle mbush sot 63 vite dhe lindi në Santa Ana, në 29 prill 1958. Duket se koha ka ndalur në vend për të. Sigurisht e ka maturuar dhe e ka bërë më grua, por vazhdon të jetë e njëjta grua e bukur si gjithherë.

Elegante, e rafinuar, spontane, aktorja 63-vjeçare është shumëdimensionale, edhe para kamerës, edhe për nga stili. Biondinë thuajse e përhershme dhe besnike.

viti 2005

Michelle Pfeiffer është seks-simbol e viteve ’80-’90, e cila sot i ka bashkar karrieerës së saj si aktore edhe karrierën si sipërmarrëse. Pas dhjetë vitesh pa pasur kokntakt me parfumet, ajo vendosi në 2019-ën, të hyjë në biznesin e aromave natyrale me markën Henry Rose, frymëzuar nga emrat e dy fëmijëve të saj, Claudia Rose dhe John Henry.

2017

Poliedrike, sidomos në sete, ajo i ka kthyer flokët e saj në tiparin dallues të secilit prej personazheve të saj.

Do donim të ndanim me ju disa nga fotot ndër vite të ikonës së filmit botëror dhe brezave të cilat inspiroi.

redaksia VIP

Stili-pandemi dhe të gjithë kuriozitetet lidhur me Oscar 2021

Meqë ethet e zgjedhjeve në Shqipëri nuk na lejuan të ishim shumë të vëmendshëm me ç’u bë në natën e madhe të Oscarëve, sot do t’ju njohim me më pikantet e asaj nate, ato që bënë të ndizeshin rrjetet sociale me thënie e kundërthënie, me pro e kundër sa i përket performancave të yjeve. Ylli i Hollivudit, Brad Pitt, për shembull, pushtoi rrjetin me versionin macho të bishtalecit të tij. Me veshje Valentino dhe pa make-up, aktorja e Nomadland-it vihet në qendër të vëmendjes, së bashku me twerking-un e Glenn Close.

Midis konfirmimeve dhe zhgënjimeve, surprizave dhe zbulimeve, nata e Oskareve ishte përsëri një kuriozitet i shtuar, madje edhe me formatin më “intim” të imponuar nga pandemia. Gjithçka në lidhje me stilin dhe hijeshinë e yjeve të pranishëm në Los Anxhelos. Duke filluar me Brad Pitt, “man bun”, pigtail macho i të cilit pushtoi menjëherë rrjetën.

Flokët e kapur bisht me stil të Brad Pitt

Plot sqim dhe me një smoking e kravatë, aktori 57-vjeçar – i cili dha çmimin e Aktores më të mirë Jo Protagoniste për Yuh-Jung Youn, ka ndezur komentet në rrjetet sociale. Ai dashnori i përjetshëm për fansat e filmit, për nga bukuria dhe mënyra se si i qaset spektatorëve në lojën e tij aktoriale. Fansat e tij ishin të gatshëm të kërkonin edhe një Oscar për të këtë vit.

Por gjithsesi, diskutimi në internet u hap, sepse jo të gjithë adhuruesit e tij ishin dakord me pamjen e re:

Ashtu si unë, edhe Brad Pitt nuk dinte se ku t’i vendoste flokët e tij-Covid“, u tall dikush, duke aluduar pë mbylljen e salloneve të bukurisë deri vonë për shkak të pandemisë.

Dikush tjetër shkoi edhe më tej: “Mos, Brad, të lutem. Hiqi flokët nga ai bishtalec. Ishte vit i vështirë, meritojmë edhe ne pak gëzim”.

Ujë e sapun për Frances McDormand

Komentet u ndezën gjithashtu në lidhje me look-un e Frances McDormand, fitueses surprizë të Oskarit për Aktoren më të Mirë. Ylli 63-vjeçar u shfaq me një fustan Valentino, por plotësisht pa grim.

Me fytyrën plotësisht pa make-up dhe në versionin ujë e sapun, pa make-up për të mbuluar rrudhat, me flokë të shprishur, anti-diva rebele, e cila ka qenë gjithmonë një mbështetëse e fuqisë së grave, u ngjit në skenë me një pamje krejtësisht natyrale.

E kishte bërë tashmë tre vjet më parë, në Oskar 2018, kur mori çmimin si Aktorja më e Mirë, duke u prezantuar pa grim dhe duke mbajtur një fjalim të përqendruar në barazinë gjinore dhe rolin e grave.

Patjetër që edhe zgjedhja e Frances McDormand, ashtu si bishti i flokëve të Brad Pitt, ndau në mes fansat e ndjekësit, me mbështetje e kritika në mediat sociale.

Twerking i Glenn Close, çfarë surprize!

Një tjetër gjë la pamend të gjithë ndjekësit e ethshëm të Oscarëve: twerking-u i Glenn Close, e cila edhe pse nuk e fitoi Oskarin edhe kësaj here, i mahniti të gjithë.

Aktorja 74-vjeçare, gjatë lojës “gjeni këngën”, në fakt gjeti titullin e muzikës, duke e imituar atë: pasi muzika ishte kolona zanore e Aule Turbolente, një film i vitit 1988. Meqë titulli ishte “Da But” (Prapanica), Glenn Close interpretoi një twerk, duke fituar kështu të paktën atë seancë konkurrimi.

Oscar 2021: Oscar i divave për divat, gjithçka për përgatitjen e ceremonisë së madhe

Ndërsa presim ditën e madhe të 5 prillit, jo për votimet në Shqipëri, por për natën e ndarjes së Oscar-ve në kinematografi, duket se po bëhen përgatitjet e fundit.

Ndërkohë është zbuluar prezantimi i natës Oscar, i cili do të ketë brenda tij emrat nga më të shquarit e botës së filmit.

Akademia tashmë ka shpallur emrat e atyre që do të dorëzojnë statujat e arta dhe janë 15 gjithsej: Angela Bassett, Halle Berry, Bong Joon Ho, Don Cheadle, Bryan Cranston, Laura Dern, Harrison Ford, Regina King, Marlee Matlin, Rita Moreno, Joaquin Phoenix, Brad Pitt, Reese Witherspoon, Renée Zellëeger dhe Zendaya.

Por postimi, me të cilin aktorët u konfirmuan, lë të hapur mundësinë e shtimit të protagonistëve në listën e pasur të divave.

Prezantuesit në skenën e Oscar 2021

Ishte viti 2018 kur në skenë u shfaq për herë të fundit vetëm një prezantues. Që prej atëherë formula ka ndryshuar dhe në skenën e teatrit Dolby në Los Angeles do të prezantojnë plot 15 yje, të gjithë fitues apo kandidatë për çmimin e madh në sesionet e mëparshme.

Midis atyre që rrëmbyen statujën e artë vitin e kaluar janë dy aktorët më të Mirë protagonistë, Joaquin Phoenix, i cili fitoi për rolin e saj në Jocker dhe Renée Zellweger, e cila u nderua për portretizimin e Judy Garland në Judy.

Brad Pitt dhe Laura Dern mbajnë kuotën e Aktorit / Aktorja më e mirë jo protagoniste, një nominim i fituar në vitin 2020 nga Pitt, me Cliff Booth-in e tij “Once Upon a Time in … Hollywood” dhe nga Dern me “Story of a Martriage”.

Pastaj është regjisori Bong Joon-Ho, i cili vitin e kaluar shpërtheu në kurorëzimin me Oscar për filmin e tij “Paraziti”, si Filmi më i Mirë, Regjia më e Mirë, Skenari më i Mirë Origjinal dhe Filmi Më i Mirë Ndërkombëtar.

Midis atyre që kanë fituar në edicionet e kaluara janë Halle Berry, Aktorja më e Mirë në 2002-shin, me “Monster’s Ball”, Regina King, e cila fitoi në të njëjtën kategori në 2019 me “If Beale Street Could Talk” dhe Reese Witherspoon, shpërblyer për filmin “Walk the Line” në rolin e June Carter. Me ta gjithashtu Marlee Matlin, aktorja e parë e shurdhër që fitoi një Oskar me “Children of a Lesser God”, në 1987.

Dhe pastaj kemi diamantin Rita Moreno, fituese në ’62-shin, me Anitën e saj në “West Side Story” si dhe një nga 16 aktorët që kanë arritur EGOT, poker i çmimeve më prestigjioze të spektakleve (Emmy, Grammy, Oscar dhe Tony).

Prezantuesit e 2021-shit, që kanë qenë kandidatë në edicionet e mëparshme

Siç thamë edhe më lartë, midis prezantuesve do të ketë edhe nga ata që për pak fituan, por që nuk mundën ta kurorëzonin Oscarin e tyre të jetës. Dhe e kemi fjalën për Harrison Ford, i cili mori nominimin e tij të vetëm për Oskar në 1986, për filmin “Witness” dhe Don Cheedle, i nominuar për Aktorin më të Mirë në 2005-ën, për Hotel Rwanda.

Për të njëjtën kategori, Bryan Cranston doli “në ring” në 2016-ën me “Trumbo”, e gjithashtu i gatshëm për të prezantuar edicionin 2021 me kolegët e tij, duke përfshirë Angela Bassett, e nominuar në 1994 për rolin e yllit Tina Turner në “What’s love got to do with it”.

I vetmi përjashtim është Zendaya, e cila tepër e re krahasuar me të tjerët, nuk ka as kandidaturë dhe as statujë. Nuk dimë nëse ta ngjitësh në skenën e prezantimit atë, është mirë apo keq, sa i përket karrierës së saj të sapo nisur, por fakti është se ajo do të jetë në skenë me “veteranët” e mësipërm.

Po kush është Zendaya?

Zendaya, një talent gjithnjë e më popullor në industrinë e filmit, tashmë ka pjesën e saj të vlerësimeve dhe nominimeve, por asgjë në qarkun e Academy Awards. Nominimi i saj i vetëm në këtë ndërmarrje gjigande si prezantuese, nuk u prit shumë mirë nga fansat e saj, të cilët janë shprehur të zhgënjyer në rrjetet sociale, pasi aktorja u përjashtua nga nominimet pavarësisht rolit premtues në filmin e shpërndarë nga Netflix, Malcom & Marie, në të cilin (përveç se e kishte prodhuar atë) ajo luan si protagoniste pranë John David Ëashington.

Traileri-film për kastën e yjeve

“Në një botë të mbushur me çmime, çfarë do të ndodhte nëse vetë ceremonia do të ishte në të vërtetë një film?”. Kështu i prezanton Akademia prezantuesit në trailerin e parë të ceremonisë, disa ditë më parë: si një kast i vërtetë filmi. Prodhuesit e edicionit të 93-të të Oskareve, Jesse Collins, Stacey Sher dhe Steven Soderbergh donin t’i qaseshin ceremonisë sikur të ishte një prodhim filmi.

“Shpresojmë që në fund të ndiheni sikur keni parë një film”, tha Soderbergh. “Çdo kandidat dhe çdo person që jep çmimet do të ndihet si personazh”.

Me pak fjalë, një ceremoni që, këtë vit më shumë se zakonisht, synon të festojë kinemanë me gjithsej.